Sænsk lögregla fækkaði í dag fólki á lista yfir einstaklinga sem saknað er eftir miklar náttúruhamfarir í Indlandshafi á annan dag jóla. Alls er 786 Svía nú saknað eftir hamfarirnar, en eftir endurskoðun á listanum fyrir viku síðan voru 893 einstaklingar á honum.
Upphaflega var óttast að allt að 3.500 Svía væri saknað eftir hamfarirnar, en talan hefur farið stöðugt lækkandi eftir því sem lögregla grennslast fyrir um nöfnin á listanum.
Um 20.000 Svíar voru á ferðalagi á þeim slóðum sem hamfarirnar riðu yfir, flestir í Taílandi.
Staðfest er að 52 Svíar létu lífið í hamförunum.
Frá því 7. janúar hefur sænsk lögregla fjarlægt 980 nöfn af listanum yfir fólk sem saknað er. Þann dag tók lögregla við málinu af sænska utanríkisráðuneytinu.