Barnahjálp Sameinuðu þjóðanna, UNICEF, segir að nærri 13% barna í Banda Aceh, héraðshöfuðborg Aceh-héraðs á Súmötru í Indónesíu, þjáist af vannæringu sem dregur úr vexti og andlegum þroska og veikir ónæmiskerfið. Segja samtökin að bregðast verði án tafar við þessu og að ástandið kunni jafnvel að vera verra í héröðum utan við borgina.
Rúmur mánuður er frá því jarðskjálfti sem mældist 9 stig varð undan ströndum Súmötru og í kjölfarið kom flóðbylgja sem lagði Aceh-hérað nánast í rúst. UNICEF segir í nýrri skýrslu, að farsóttahætta sé enn í búðum, sem reistar voru fyrir þá sem misstu heimili sín. Þá sé dreifing hjálpargagna enn nokkuð tilviljunarkennd. Hins vegar fari ástandi í heild skánandi.
„Við vitum að ýmsum þörfum er ekki sinnt. En við höfum ekki lengur áhyggjur af því að fólk svelti. Verið er að opna skóla á ný. Það er merki um að ástandið er að batna," sagði Bo Asplund, fulltrúi Sameinuðu þjóðanna í Indónesíu.
Í einni skýrslu, sem gefin var út á vegum SÞ, segir að hreinlætisaðstæður séu hræðilegar í nokkrum búðum, sem komið hefur upp. Fólk þurfi að gera þarfir sínar á ökrum og í ár og tjarnir þar sem það baðar sig einnig. Asplund sagði, að þetta ætti við um nokkrar búðir í strandhéröðum en samt væri ástandið í heild að skána.
Í dag munu fulltrúar uppreisnarmanna og stjórnvanda bæði í Indónesíu og Sri Lanka eiga fundi sem miða að því að draga úr spennu á hamfarasvæðunum svo auðveldara verði að hjálpa þeim sem komust lífs af. Uppreisnarmenn í Aceh-héraði, sem vilja stofna sjálfstætt ríki, hafa barist þar við stjórnarhermenn í þrjá áratugi. Eftir hamfarirnar 26. desember var samið um vopnahlé en báðar hliðar hafa sakað hvor aðra um brot á þeim samningi. Fulltrúar uppreisnarmanna og stjórnvalda munu eiga viðræður í dag í Helsinki í Finnlandi í dag þar sem markmiðið er að semja um formlegt vopnahlé. Susilo Bambang Yudhoyono, forseti Indónesíu, hefur boðið uppreisnarmönnum sjálfsstjórn gegn því að þeir falli frá kröfum um sjálfstætt ríki.