Jústsjenko víkur ríkisstjórn Úkraínu frá

Viktor Jústsjenko, forseti Úkraínu, hefur vikið allri ríkisstjórn landsins frá, að sögn forsetaskrifstofu landsins. Hefur Júrí Jekhanúróv, héraðsstjóri í Dniepropetrovsk, verið skipaður forsætisráðherra til bráðabirgða í stað Júlíu Tímótsjenkó sem verið hefur helsti samstarfsmaður forsetans um langa hríð. Einnig hefur forsetinn ákveðið að víkja þjóðaröryggisráði landsins frá.

Þessi ákvörðun kemur í kjölfar uppsagna tveggja háttsettra samstarfsmanna forsetans en þeir sögðust ekki lengur geta þolað þá spillingu, sem þrifist í úkraínska stjórnkerfinu. Í morgun sagði einnig Petro Porotsjenkó, yfirmaður öryggis- og varnarmálaráðs landsins, af sér en hann er einn þeirra sem sakaður hefur verið um spillingu.

Jústsjenko sagði í kjölfarið, að hann vildi að þau Tímótsjenkó og Porotsjenkó væru áfram í ríkisstjórn en þau yrðu þá að geta unnið saman.

Jústsjenko naut mikilla vinsælda fyrst eftir að hann komst til valda í byrjun ársins, en á síðustu vikum hefur hann sætt sívaxandi gagnrýni fyrir það hve hægt gengur að koma á umbótum í stjórnkerfi og efnahagslífi landsins.

• Blogga um frétt