Erlent | mbl | 28.9.2011 | 8:38

KB-hallen verður ekki bjargað

KB-hallen.

Slökkviliðið í Kaupmannahöfn segir ljóst, að ekki sé hægt að bjarga íþrótta- og tónleikahúsinu KB-hallen á Frederiksberg en eldur kviknaði í húsinu í nótt. Hefur verð ákveðið að reyna ekki frekar að slökkva eldinn í húsinu og bíða þar til hann deyr út af sjálfu sér.

Talið er að eldurinn hafi kviknað í anddyri byggingarinnar en það er brunnið til grunna. Eldur logar enn glatt inni í byggingunni sjálfri.

Árleg kynlífssýning átti að hefjast í byggingunni í dag og því dvöldu um 20 manns í KB-hallen í nótt. Þá sváfu nokkrir í hjólhýsum utan við bygginguna. Einn var fluttur á sjúkrahús vegna gruns um reykeitrun.

KB-hallen var tekin í notkun árið 1938 og var þá stærsta íþróttahöll í einkaeigu. Þar hafa verið haldnir margir sögufrægir tónleikar og hafa meðal annars Bítlarnir og Louis Armstrong komið þar fram. Nýlega var húsið gert upp en ytra byrði þess var friðað.