Myndavélar verða ekki leyfðar í dómsal í næstu viku þegar James Holmes, sem er sakaður um að hafa myrt 12 og sært 58 í skothríð í kvikmyndahúsi í síðustu viku, verður formlega ákærður.

Fjölmiðlar í Colorado óskuðu eftir að fá að hafa ljósmyndara og myndatökumenn í dómsalnum en dómarinn William Sylvester neitaði. Lögmaður Holmes hafði óskað eftir að beiðninni yrði neitað. Upptökur eru til af því þegar Holmes var leiddur fyrir dómara á mánudaginn.

Að sögn fréttastofu ABC er Holmes látinn bera sérstaka grímu vegna þess að hann hrækti í sífellu á fangaverði.

Nokkrir ættingjar fórnarlamba skotárásarinnar hafa hvatt fjölmiðla til að birta ekki myndir af Holmes og forðast að nota nafn hans. „Ég vil ekki að fjölmiðlar birti nafn hans í sífellu,“ sagði Jordan Ghawi en systir hans Jessica lést í kvikmyndahúsinu.

Eins og margoft hefur komið fram hóf Holmes skothríð skömmu eftir að sýning hófst á nýjustu Batman-myndinni The Dark Knight Rises í kvikmyndahúsi í Aurora í Colorado. Aðalleikarinn Christian Bale heimsótti spítalann í Aurora í gær og heilsaði upp á þá sem særðust í árásinni. Að sögn starfsmanns sjúkrahússins hafði Bale beðið um að fá að koma í heimsókn en óskaði eftir því að fjölmiðlar yrðu ekki látnir vita. Bale hitti einnig sjúkraflutningamenn, lækna og lögreglumenn sem komu að því að sinna fólki eftir skotárásina.

Tengdar fréttir

Skotárás í kvikmyndahúsi í Colorado

Hætta sölu á öflugum rifflum

• Holmes dæmdur í lífstíðarfangelsi
• „Hann lifir, hann andar“
• Sleppur við dauðarefsinguna
• Dauðadómur eða lífstíðarfangelsi?

» Fleiri tengdar fréttir

• Blogga um frétt