Erlent | mbl | 10.12.2012 | 21:03

Skelfd börn og skattaframtöl í kostulegri kosningabaráttu

Mynd 1 af 31 Barack Obama forseti stingur upp í sig franskri kartöflu á kosningafundi með stuðningsmönnum sínum á hamborgarastaðnum OMG í Míamí í Flórída í lok september. Matur hafði komið áður við sögu kosningabaráttunnar. AFP

Mynd 2 af 31 Barack Obama í fangi Scott Van Duzer, eiganda veitingastaðarins Big Apple Pizza and Pasta í Flórída í heimsókn forsetans þangað 9. september. Uppátækið vakti mikla athygli. Hafði eigandi staðarins gerst svo djarfur að taka forseta Bandaríkjanna, valdamesta mann heims í fangið upp úr þurru eða var þetta sviðsett í þágu kosningabaráttunnar? AFP

Mynd 3 af 31 Barack Obama dregur augað í pung í kjölfar brandara um fæðingastað sinn í árlegum kvöldverði í Hvíta húsinu þangað sem frægum leikurum og fjölmiðlafólki er boðið. Mikið var rætt um það í upphafi kosningabaráttunnar, nú og síðast, hvort að Obama væri raunverulega fæddur í Bandaríkjunum. AFP

Mynd 4 af 31 Engri mynd hafði verið deilt jafn oft á Twitter og þeirri sem Barack Obama setti inn á samskiptasíðuna af sér og eiginkonunni Michelle eftir að ljóst var að hann hafði sigrað kosningarnar. AFP

Mynd 5 af 31 Kosningabaráttan var vel á veg komin strax um páskana í apríl og Barack Obama lét sig ekki muna um að skella sér í nokkrar armbeygjur í hinni árlegu páskaeggjaleit við Hvíta húsið. AFP

Mynd 6 af 31 Fjölskyldan sem var kosin til veru í Hvíta húsinu. AFP

Mynd 7 af 31 Utanríkisráðherrann Hillary Clinton dásamaði sinn mann, Barack Obama, við hvert tækifæri í kosningabaráttunni. Hún hefur ekki hugsað sér að sitja mikið lengur á ráðherrastóli. AFP

Mynd 8 af 31 Endalausir fundir. Endalausar samkomur. Mitt Romney messar yfir stuðingsmönnum sínum úr hópi fyrrverandi hermanna í Ohio, aðeins örfáum dögum fyrir kosningarnar. AFP

Mynd 9 af 31 Kona og börnin. Barack Obama á úrslitakvöldi kosninganna ásamt eiginkonunni Michelle og dætrunum Söshu og Maliu, á samkomu í Illinois. AFP

Mynd 10 af 31 Barack Obama og Michelle í faðmlögum daginn eftir að úrslit kosninganna voru orðin ljós. AFP

Mynd 11 af 31 Sarah Obama, stjúpamma Baracks bregst við fréttum af því að barnabarnið hefði verið endurkjörið forseti Bandaríkjanna. Sarah býr í Kenía en þangað á forsetinn rætur sínar að rekja. AFP

Mynd 12 af 31 Forsetafjölskyldan gengur frá borði forsetaflugvélarinnar daginn eftir að Barack Obama var endurkjörinn. AFP

Mynd 13 af 31 Það liggur við að fréttir af endurkjöri Bandaríkjaforseta hafi verið jafnmikil stórfrétt á Indlandi og í Bandaríkjunum. AFP

Mynd 14 af 31 Barack Obama á sér stuðingsmenn meðal fólks úr öllum stéttum og á öllum aldri. AFP

Mynd 15 af 31 Indverski listamaðurinn Sudaran Pattnaik leggur lokahönd á risavaxið verk úr sandi af andliti Baracks Obama, stuttu eftir að hann var endurkjörinn. AFP

Mynd 16 af 31 Indverski málarinn Jagjot Singh leggur lokahönd á málverk af Barack Obama sem hann sendi svo forsetanum sem gjöf með hamingjuóskum um endurkjörið. AFP

Mynd 17 af 31 Bollakökur skreyttar með fánum á kosningadaginn. AFP

Mynd 18 af 31 Það besta á enn eftir að gerast, sagði Obama er hann var endurkjörinn. AFP

Mynd 19 af 31 Fólk flykktist út á götur New York og fylgdist með úrslitum kosninganna á risaskjá. AFP

Mynd 20 af 31 Mitt Romney úr pappa. AFP

Mynd 21 af 31 Barack Obama úr pappa. AFP

Mynd 22 af 31 Mitt Romney kyssir eiginkonuna Ann rembingskossi skömmu eftir að hann játaði ósigur sinn í kosningunum. AFP

Mynd 23 af 31 Búið spil. AFP

Mynd 24 af 31 Leirstytta af Barack Obama, svokölluð „caganer“. Rík hefð er fyrir styttum af frægu fólki í þessum stellingum í Katalóníu á Spáni. Stytturnar tákna frjósemi, von og gæfu. AFP

Mynd 25 af 31 Barack Obama á leið upp á svið á kosningafundi í menntaskóla í Ohio. Aðeins nokkrir dagar til stefnu. AFP

Mynd 26 af 31 Barack Obama kjassar lítið barn á kosningafundi í lok október í Mississippi. AFP

Mynd 27 af 31 Ha ha ha! Þrennar kappræður fóru fram á milli forsetaefnanna. Þær voru á kurteislegum nótum. AFP

Mynd 28 af 31 Mitt Romney ræðir málin við barnabarn sitt, Miles, við fjölskyldukvöldverð í Flórída í lok október. Fréttamennirnir fylgdu honum hvert fótmál síðustu vikurnar. AFP

Mynd 29 af 31 Mitt Romney heldur á barni sem virðist skelfingu lostið á kosningafundi í Springfield í Virginíu í lok september. Kannanir bentu á tímabili til að fylgið væri hnífjafnt með þeim Obama með kjósenda. AFP

Mynd 30 af 31 Mitt Romney leikur við fimm börn sonar síns Josh um borð í flugvél sinni. Ein frægustu ummæli kosningabaráttunnar féllu á fjáröflunarfundi í Kaliforníu í lok september er Romney sagðist ekki skilja af hverju ekki mætti opna glugga á flugvélum í flugi. Hann sagði þetta brandara en margir töldu honum hafa verið fúlasta alvara. AFP

Mynd 31 af 31 Mitt Romney heldur á barni í Lebanon, Ohio. AFP

Þau eru mörg kostulegu og eftirminnilegu augnablikin úr kosningabaráttu þeirra Mitts Romneys og Baracks Obama. í baráttunni var grínast og hæðst, tekist á um skattframtöl Romneys og fæðingarvottorð Obama.

Ýmis ummæli féllu - sum í grýttan jarðveg. Þannig varð það t.d. með 47% hans Romneys. Hann sagði á fjáröflunarfundi í maí að 47% bandarísku þjóðarinnar væru háð ríkinu fjárhagslega. Þessi hópur myndi kjósa Obama. Upptaka af þessum ummælum var gerð opinber í september, örfáum vikum fyrir kosningadag. Margir héldu að hún myndi hafa gríðarleg og neikvæð áhrif á fylgi Romneys, en annað átti eftir að koma í ljós.

Kosningabaráttan á það til að harðna eftir því sem nær dregur kjördegi. Það sem hins vegar kom ef til vill í veg fyrir það að slúður og hneykslisfréttir kæmu upp á yfirborðið í þessum kosningum var sú staðreynd að mannskæður fellibylur gekk yfir Bandaríkin. Fórnarlömb Sandy og það gríðarlega tjón sem fellibylurinn olli varð til þess að vopnin voru lögð til hliðar.

Frambjóðendurnir tóku þó upp á ýmsu til að halda athygli áhorfenda og vinna atkvæði kjósenda. Þeir tókust á í þrennum kappræðum og undir lokin þótti nokkuð tvísýnt hvor myndi hafa betur.

„Fjögur ár til viðbótar,“ sungu stuðningsmenn Obama þegar ljóst var að hann hefði verið endurkjörinn forseti. Obama viðurkenndi að hafa haft fiðrildi i maganum þann dag - og setti svo á Twittersíðu sína vinsælustu mynd samfélagsvefsins frá upphafi. Önnur fræg mynd úr þessari baráttu sýnir háskælandi barn í fangi Romneys á einum af hans fjölmörgu kosningafundi.

Meðfylgjandi er myndskeið sem sýnir hápunkta kosningabaráttunnar og hér að ofan má sjá með því að smella á renninginn myndasyrpu frá hápunktum baráttunnar.