Lögmenn stofnanda PIP brjóstapúðaframleiðandans, Jean-Claude Mas, segja að hann hafi ekki brotið af sér en fyrirtækið seldi gallaða brjóstapúða og hafa saksóknarar farið fram á fjögurra ára fangelsisdóm yfir Mas.

Aðalmeðferð í máli Mas lauk í frönsku borginni Marseille í dag en Claude Veillard, dómari, segir að dómur falli í málinu þann 10. desember nk.

Verjendur Mas fóru fram á að hann fengi vægari refsingu heldur en saksóknarar hafa farið fram á en um fimm þúsund konur taka þátt í hópmálssókn gegn honum.

Mas stofnaði PIP (Poly Implant Prothese) árið 1991 og er talið að um 300.000 konur í 65 löndum, m.a. Íslandi, hafi fengið púðana. PIP-púðarnir eru tvisvar sinnum líklegri en aðrir til að rofna.

Saksóknarar fara einnig fram á að Mas verði gert að greiða 100 þúsund evrur í sekt og honum verði bannað að starfa í heilbrigðisgeiranum eða að reka fyrirtæki.

Auk Mas eru fjórir yfirmenn hjá PIP ákærðir í málinu sem er eitt það stærsta í réttarsögu Frakklands.

Tengdar fréttir

PIP-brjóstapúðar

Bótaskylda vegna PIP-púða staðfest í máli 2.500 kvenna

• „Mikilvægur áfangasigur“
• Bótaskylda viðurkennd vegna brjóstapúða
• Mesti sigur sem hægt var að vinna
• Íslensku konurnar áfrýja í PIP-málinu

» Fleiri tengdar fréttir

• Blogga um frétt