Recep Tayyip Erdogan, forsætisráðherra Tyrklands, segir að ekki verði hætt við fyrirhugaðar framkvæmdir í almenningsgarði í Istanbúl þrátt fyrir fjölmenn mótmæli víða um land.

Erdogan segir að hluti mótmælenda séu „öfgamenn“. Þá segir hann að erlendir ríkisborgarar hafi verið handteknir í tengslum við óeirðirnar sem hafa brotist út.

Forsætisráðherrann, sem hefur verið á ferðalagi í Norður-Afríku, er væntanlegur til Tyrklands í dag, að því er segir á vef breska ríkisútvarpsins.

Boðað hefur verið til frekari mótmæla í landinu í kjölfar ummæla Erdogans. Mótmælendurnir vonuðust til að hann myndi rétta fram sáttahönd og væri reiðubúinn að sættast á málamiðlum.

Fram kemur á vef BBC, að fréttaskýrendur telji aftur á móti að ummæli forsætisráðherrans muni virka sem olía á eldinn. Ummælin hafa einnig haft áhrif á fjárfesta en hlutabréfaverð í tyrknesku kauphöllinni lækkaði um tæp 5% í kjölfar yfirlýsingar Erdogans.

Upprunalega hófust mótmælin í síðustu viku vegna fyrirætlana stjórnvalda í Istanbúl um byggingu verslunarmiðstöðvar í Gezi-garðinum sem er nálægt Taksim-torgi. Eftir harkaleg viðbrögð lögreglu jukust mótmælin og fóru að beinast að tyrkneskum stjórnvöldum vegna íhaldssemi þeirra og aukinna tengsla tyrkneska stjórnkerfisins og íslams.

Tengdar fréttir

Tyrkir mótmæla

Táragasi beitt gegn mótmælendum

• Beitti táragasi á mótmælendur
• Komu saman og syrgðu unglingspilt
• Táragasi beitt í Ankara
• Óeirðir í kjölfar dómsins

» Fleiri tengdar fréttir

• Blogga um frétt