Recep Tayyip Erdogan, forsætisráðherra Tyrklands, hvatti stuðningsmenn sína í dag í kjölfar mótmæla gegn stjórnvöldum sem stóðu yfir gærkvöldi og í nótt. Kveikt var í dekkjum og flugeldum var kastað í lögreglu sem svaraði með táragasi.

Átökin hafa sett enn meiri þrýsting á ríkisstjórn Tyrklands eftir að hann fyrirskipaði að mótmælunum skyldi hætt. Erdogan hefur ekki mætt viðlíka andstöðu og mótspyrnu á sinni 10 ára valdatíð.

Þúsundir mótmælenda söfnuðust saman á götum Istanbúl í nótt þar sem mótmæli og átök hafa geisað undanfarna 10 daga. Einnig komu mótmælendur saman í höfuðborginni Ankara og í borginni Izmir á vesturströnd landsins.

Mótmælin fóru að mestu friðsamlega fram en tyrkneskir fjölmiðlar greina hins vegar frá því að margir hafi særst í átökum sem blossuðu í Ankara. Þá réðist lögreglulið gegn um 10.000 mótmælendum.

Þá brutust út átök í Gazi-hverfinu í Istanbúl.

Kenni mótmælendum lexíu með því að kjósa AKP á næsta ári

Erdogan hefur neitað að verða við kröfum mótmælenda. Í dag hvatti hann stuðningsmenn sína til að svara andstæðingum sí num með því að kjósa flokk Erdogans, sem nefnist Réttlætis- og þróunarflokkurinn (AKP), í sveitastjórnarkosningunum sem fara fram í Tyrklandi á næsta ári.

„Það eru aðeins sjö mánuðir fram að sveitastjórnarkosningunum. Ég vil að þið kennið þeim lexíu með lýðræðislegum hætti á kjörstað,“ sagði Erdogan á flugvellinum í borginni Adana, sem er í suðurhluta landsins. Þar tóku þúsundir stuðningsmanna forsætisráðherrans á móti honum og veifuðu tyrkneska fánanum.

Ríkisstjórn Tyrklands hélt því fram í gær að yfirvöld hefðu náð tökum á mótmælaöldunni, en aðeins nokkrum klukkustundum síðar safnaðist saman mikill fjöldi á Taksim-torgi í Istanbúl.

Tengdar fréttir

Tyrkir mótmæla

Táragasi beitt gegn mótmælendum

• Beitti táragasi á mótmælendur
• Komu saman og syrgðu unglingspilt
• Táragasi beitt í Ankara
• Óeirðir í kjölfar dómsins

» Fleiri tengdar fréttir

• Blogga um frétt