Tala látinna í lestarslysinu á Spáni fór hækkandi í nótt og er nú ljóst að minnst 77 létu lífið og yfir 100 slösuðust, þegar farþegalest fór út af sporinu nærri Santiago de Compostela. Þetta er versta lestarslys á Spáni í yfir 40 ár, að því er fram kemur á BBC.

Lestin var á hraðleið frá höfuðborginni Madrid til hafnarborgarinnar Ferrol þegar alls 8 vagnar hennar fóru út af sporinu í beygju um 3 km utan við Santiago de Compostela.

Ekki hryðjuverk heldur slys

Í spænskum fjölmiðlum kemur fram að talið sé að lestinni kunni að hafa verið ekið á allt að tvöföldum leyfilegum hraða. Nokkrir sjónarvottar hafa sagt í fjölmiðlum að lestin hafi verið á miklum hraða. Einn þeirra, Ricardo Montesco, sagði að vagnarnir hafi „hlaðist hver ofan á annan“ þegar lestin fór út af í beygjunni.

Í tilkynningu frá spænskum stjórnvöldum segir að talið sé að um slys hafi verið að ræða, en ekki hryðjuverk. Orsök slyssins er nú til rannsóknar.

Almenningur flykktist til að gefa blóð

Björgunarmenn unnu á vettvangi slyssins í alla nótt og enn er leitað í braki lestarinnar. 73 lík hafa fundist en að auki létust 4 á sjúkrahúsi. Yfir 140 manns liggja slasaðir á sjúkrahúsum. Þegar fyrstu fregnir bárust af slysinu flykktust íbúar í nágrenni slyssins til að gefa blóð, að beiðni heilbrigðisyfirvalda.

Mariano Rajoy forsætisráðherra Spánar, sem er fæddur í Santiago de Compostela, boðaði neyðarfund ríkisstjórnarinnar seint í gærkvöldi. Hann mun sjálfur fara á vettvang slyssins í dag.

Pílagrímshátíðinni aflýst

Í dag átti að fara fram stærsta pílagrímshátíð Santiago de Compostela og er von á þúsundum kristinna pílagríma til borgarinnar. Ferðamálaráð borgarinnar tilkynnti hins vegar í morgun að allri hátíðardagskrá sé aflýst í bili.

BBC hefur eftir spænska blaðamanninum Francisco Carnino að borgarbúar séu í áfalli. „Þetta er pínulítill staður og hér gerist aldrei neitt, hvorki mikilvægt né harmrænt. Við vorum bara að undirbúa hátíðahöld og nú virðist hafa orðið versta lestarslys í áraraðir.“

Spænska lestarkerfið er almennt talið fremur öruggt og hefur miklum fjármunum verið varið í uppbyggingu þess.

Allt að fimmtíu látnir á Spáni

Unnið var á vettvangi lestarslyssins í alla nótt og í birtingu var ljóst að minnst 77 eru látnir. AFP

Björgunarmenn eru enn að störfum á vettvangi slyssins í útjaðri Santiago de Compostela. AFP

Að sögn sjónarvotta var aðkoman að slysinu hræðileg og lágu lík á víð og dreif um lestarteinana. AFP

Lestarslys á Spáni

• Ágúst 2006: Lest fór út af sporinu í borginni Villada í Palencia. 6 létu lífið og tugir slösuðust.
• Júlí 2006: A.m.k. 43 létu lífið í árekstri neðanjarðarlestar í borginni Valencia.
• Júní 2003: Minnst 19 létu lífið og um 40 slösuðust þegar tvær lestar skullu saman við Chinchilla.
• Mars 2002: Tvær hraðlestar í árekstri í Katalóníu með þeim afleiðingum að 4 létust og 80 slösuðust.

Tengdar fréttir

Lestarslys á Spáni

Upptökur af ummælum lestarstjórans birtar

• Veit ekki hvað hann var að hugsa
• Lestarstjórinn var í símanum
• Fórnarlömb slyssins borin til grafar
• Ákærður fyrir 79 manndráp

» Fleiri tengdar fréttir

• Blogga um frétt