Tilvonandi forsætisráðherra Noregs, Erna Solberg, fékk að sofa út í morgun og svaraði eiginmaður hennar, Sindre Finnes, spurningum fjölmiðlafólks sem sem beið fyrir utan heimili þeirra snemma í morgun. Noregur hefur aldrei verið jafn blár og nú segja stjórnmálaskýrendur.

„Erna fær að sofa í hálftíma í viðbót,“ segir Finnes við fréttamennina sem standa fyrir utan heimili þeirra í Smestad í Ólsó en Solberg mun ræða við fréttamenn klukkan 10 að norskum tíma, klukkan átta að íslenskum tíma og verður hægt að fylgjast með beinni útsendingu á vef Aftenposten.

Á vef norska ríkisútvarpsins kemur fram að Verkamannaflokkurinn hafi fengið 55 þingmenn og tapað 9 þingmönnum frá síðustu kosningum. Þrátt fyrir tap er Verkamannaflokkurinn enn stærsti flokkur Noregs, með 30,9% fylgi.

Hægriflokkurinn fékk 48 menn kjörna á þing sem er fjölgun um 18 þingmenn frá síðustu kosningum. Flokkurinn er með 26,8% atkvæða.

Framfaraflokkurinn er með 29 þingmenn og tapar tólf þingmönnum. Er flokkurinn með 16,4% fylgi.

Aðrir flokkar fengu minna fylgi en hægt er að skoða nánar hér

Finnes sér fram á að sjá minna af konu sinni næstu árin en hingað til. Hann segist eiga von á því að þau flytji í forsætisráðherrabústaðinn eftir fimm eða sex vikur.

Solberg sagði á kosningavöku Hægriflokksins í gærkvöldi að nú myndi fara af stað vinna í að mynda ríkisstjórn mið- og hægriflokkanna en ekki liggur fyrir hvort allir flokkarnir munu fá ráðherra eða hvort minni flokkarnir tveir, Venstre og kristilegir demókratar munu styðja stjórnina.

Formenn þriggja stærstu flokkanna í Noregi, Jens Stoltenberg, Verkamannaflokknum, Erna Solberg formaður Hægriflokksins og Siv Jensen formaður Framfaraflokksins. AFP

Tengdar fréttir

Þingkosningar í Noregi

Boðið að taka við öðrum flokki

• Ný ríkisstjórn tekur við völdum
• Stjórnarsáttmáli í höfn í Noregi
• Varaformaðurinn fær ekki ráðherrastól
• „Sögulegt stjórnarsamstarf“ í Noregi

» Fleiri tengdar fréttir

• Blogga um frétt