Nadezhda Tolokonnikova, meðlimur pönkhljómsveitarinnar Pussy Riot, hefur verið flutt í fangabúðir í Síberíu, nokkur þúsund kílómetrum frá Moskvu. Þetta hefur talsmaður hins opinbera loks staðfest.

Tolokonnikova afplánar nú tveggja ára fangelsisdóm fyrir þátttöku sína í mótmælum gegn Vladimír Pútín foresta í kirkju í Moskvu. Vinir og ættingjar hennar hafa hvorki séð hana né heyrt frá henni síðan 22. október.

Rússnesk fangelsismálayfirvöld tilkynntu í síðasta mánuði að hún yrði flutt í annað fangelsi í kjölfar hungurverkfalls sem hún fór í. Hafði hún óskað eftir flutningi milli fangelsa en afplánun hennar á að ljúka í mars.

Hún hafði kvartað opinberlega um þrælkun í fangelsinu og að hafa fengið morðhótanir frá yfirmönnum fangelsisins í Mordovíu þar sem hún dvaldi.

Í fréttatilkynningu sem gefin var út í dag er í fyrsta sinn staðfest að hún hafi verið flutt í fangelsi í Síberíu. Þar kemur fram að flutningurinn sé vegna þess að hin 24 ára gamla Tolokonnikova er með lögheimili í borginni Norilsk, skammt frá fangabúðunum. Hins vegar býr eiginmaður hennar ásamt dóttur þeirra í Moskvu.

Í frétt AFP-fréttastofunnar segir að flutningurinn í afskekktara fangelsi virðist því fyrst og fremst vera refsing. Fangelsið er í um 3.000 kílómetra fjarlægð frá Moskvu.

Samkvæmt rússneskum lögum þurfa fangelsismálayfirvöld ekki að tilkynna ættingjum um flutning fanga fyrr en 10 dögum eftir að flutningarnir eiga sér stað.

Tengdar fréttir

Pussy Riot

Íslensk liðskona Pussy Riot eftirlýst

• Liðsmenn Pussy Riot öðlast íslenskan ríkisborgararétt
• Neita að gefa upplýsingar um neyðarvegabréf
• Pussy Riot til landsins í nóvember
• Liðsmenn Pussy Riot fá hæli í Svíþjóð

» Fleiri tengdar fréttir

• Blogga um frétt