Allar byggingar og mannvirki í bænum Hasvåg í sveitarfélaginu Flatanger í Norður-Þrændalögum í Noregi eru nú brunnin, en skógar- og kjarreldar hafa logað á þessum slóðum síðan í gærkvöldi. Slökkviliði gengur illa að ráða við eldinn og vegna hvassviðris hefur ekki verið hægt að nýta þyrlur sem skyldi við slökkvistörf. Ekki er vitað um nein slys á fólki vegna eldsins.

Á annað hundrað hús hafa nú brunnið og tugir til viðbótar eru í hættu.

Fjórar þyrlur eru í viðbragðsstöðu á svæðinu, þess albúnar að varpa vatni yfir eldinn og þeirrar fimmtu er beðið. Aðeins einni þeirra hefur tekist að komast á loft vegna veðursins.

Hans Petter Haukø, slökkviliðsmaður í Hasvåg, segir í samtali við norska dagblaðið  Trønder-Avisa að allt sé nú brunnið sem brunnið geti í bænum. „Allt hefur jafnast við jörðu í Hasvåg,“ segir hann. 

Upptök eldsins eru talin hafa verið á svæði sem heitir Uran og að hann hafi kviknað eftir að línur í háspennumastri slógust saman í miklu hvassviðri. Þaðan barst eldurinn áfram í smábæi í nágrenninu, en á þessum slóðum er talsvert af sumar- og frístundahúsum.

Skammt er liðið frá öðrum stórbruna í Noregi, en miklar skemmdir urðu þegar eldur kom upp í bænum Lærdal í Sognfirði um næstsíðustu helgi.

Frétt mbl.is: Kviknaði í út frá raflínu

Tengdar fréttir

Eldar í Þrændalögum

Yfirgáfu hús vegna elds í Þrændalögum

• Vel fylgst með Flatanger
• Fengu að snúa aftur í hús sín
• Varúðarástand á vesturströnd Noregs
• Nýir eldar kvikna á Frøya

» Fleiri tengdar fréttir

• Blogga um frétt