Erlent | mbl | 7.2.2014 | 7:01 | Uppfært 10:06

Tengist bæði Hoffman og Winehouse

EPA

Tónlistarmaður sem er í haldi lögreglu í tengslum við andlát leikarans Philips Seymour Hoffman tengdist bresku söngkonunni Amy Winehouse, samkvæmt frétt Times í dag.

Robert Vineberg, 57 ára, lék á saxófón á plötu Winehouse Frank árið 2003. Hoffman lést á sunnudag úr ofneyslu heróíns og er Vineberg í haldi lögreglu grunaður um að selt Hoffman heróínið ásamt fleirum. Winehouse, sem lést árið 2011 27 ára að aldri átti við áfengis- og vímuefnafíkn að stríða.

Samkvæmt Times á Vineberg að hafa spilað með tónlistarmönnum eins og David Bowie, Mick Jagger og Tom Jones.

Lögreglan handtók fyrr í vikunni þrjár karla og eina konu í tengslum við andlát Hoffman. Um 350 umslög með heróíni fundust í íbúð Vineberg en samkvæmt heimildum CNN er um aðra gerð af efnablöndu en fannst í íbúð Hoffmans.

Þau sem lögregla handtók á þriðjudag auk Vineberg heita Juliana Luchkiw og Max Rosenblum, bæði 22 ára, og Thomas Cushman, 48 ára.

Luchkiw neitaði sök er hún kom fyrir dómara í gærkvöldi og verjandi Luchkiw sagði dómaranum að skjólstæðingur hans hefði aldrei komist í kast við lögin. Verjandinn tók fram að faðir Luchkiw væri lögfræðingur og móðirin læknir.

Luchkiw var látin laus í gærkvöldi en gert að mæta fyrir dómara á ný þann 14. febrúar. Kókaín fannst á heimili hennar og eitthvað sem talið er vera leifar heróíns en að sögn lögmanns hennar hefur hún aldrei komið nálægt sölu á fíkniefnum.

Rosenblum mætti einnig fyrir dómara í gærkvöldi en hann hefur hins vegar áður komist í kast við lögin í tengslum við fíkniefni. Hann var einnig látinn laus en var gert að greiða tryggingu sem fjölskylda hans greiddi fyrir hann í gærkvöldi. Hann mun búa á heimili foreldra sinna þangað til rannsókn málsins lýkur. Hann neitaði einnig að hafa selt Hoffman fíkniefni.

Símanúmer Hoffmans fannst í síma Vineberg og fannst mikið magn heróíns, 350 skammtar, í íbúð hans.

Cushman hafði áður verið látinn laus enda taldi saksóknari ekki hægt að tengja hann á nokkurn hátt við málið.

Frétt CNN