Nadesjda Tolokonnikova og Maria Alyokhina, meðlimir rússnesku pönksveitarinnar Pussy Riot, segja engan brottrekstur hafa átt sér stað og að þær tilheyri ennþá sveitinni.

„Við erum ennþá í Pussy Riot,“ sögðu þær Tolokonnikova og Alyokhina á blaðamannafundi í Berlín í Þýskalandi í dag. 

Þær sátu báðar í rússneskum fangabúðum í tæp tvö ár að hafa flutt pönkmessu í kirkju í Moskvu þar sem þær ákölluðu Maríu guðsmóður og báðu hana um að losa Rússland við Vladimir Pútín forseta. Þær voru látnar lausar í desember, þremur mánuðum áður en afplánun þeirra átti að ljúka.

Í síðustu viku sendu sex aðrir liðsmenn sveitarinnar frá sér yfirlýsingu þar sem fjölmiðlar voru beðnir um hætta að leggja nafn sveitarinnar við Nadesjdu og Maríu. Þær hefðu misst sjónar á grunngildum Pussy Riot, femínisma og baráttu gegn harðstjórn. Yfirlýsingin var send í kjölfar þess að þær komu fram á tónleikum með Madonnu í New York og þar kom m.a. fram að það að selja miða á tónleika væri í andstöðu við gildi sveitarinnar.

Undir yfirlýsinguna voru rituð dulnefni og þær Tolokonnikova og Alyokhina segjast ekkert kannast við þau. „Ég veit ekki hvaða fólk þetta er,“ sagði Tolokonnikova í dag og sagði að yfirlýsingin ein og sér græfi undan hugmyndafræði Pussy Riot, því hver sem er ætti að geta orðið meðlimur þar.