Erlent | mbl | 13.5.2014 | 10:02 | Uppfært 16:43

Byssan tengd glæpagengi í Maine

Tamerlan Tsarnaev var 26 ára þegar hann lést.

Byssan sem Tamerlan Tsarnaev var með þegar hann lenti í skotbardaga við lögreglu fjórum dögum eftir tilræðið við Boston-maraþonið í fyrra var áður í eigu glæpagengis í Maine. Þetta kemur fram í frétt Los Angeles Times.

Tamerlan Tsarnaev særði lögreglumann alvarlega í umsátri lögreglu og þrátt fyrir að vera særður sjálfur skaut hann á lögreglu þar til hún tæmdist. Síðasta verk hans var að kasta byssunni í lögregluna skömmu áður en hann lést af völdum skotsára.

Byssan, svört Ruger P95, með raðnúmerið 317-87693, var áður í eigu glæpagengis sem seldi krakk kókaín í Portland, Maine.

Samkvæmt LAT telja yfirvöld að Tsarnaev hafi verið í tengslum við glæpagengið í Maine og þannig fjármagnað ferðalag sitt til Tétsníu og Dagestan snemma á árinu 2012. Tamerlan Tsarnaev var þar í hálft ár. Eins er talið að hann hafi notað eiturlyfjapeninga til þess að kaupa hráefni fyrir sprengjugerðina. Alls létust þrír í tilræðinu og rúmlega 260 særðust.

Dzhokhar Tsarnaev, yngri bróðir hans, hefur játað sig sekan um 30 ákæruatriði sem tengjast tilræðunum, þar á meðal 17 brot sem hvert um sig getur varðað dauðarefsingu eða lífstíðarfangelsisdóm.

Tsarnaev er einnig ákærður fyrir morð á lögreglumanni í Tækniháskóla Massachusetts (MIT) á flótta bræðranna undan laganna vörðum eftir tilræðin.