Kosinn forseti framkvæmdastjórnar
Setja bókamerki
Jean-Claude Juncker frá Lúxemborg var í dag kjörinn forseti framkvæmdastjórnar Evrópusambandsins á Evrópuþinginu. Juncker er frambjóðandi EPP, þingflokks mið- og hægrimanna á þinginu, sem hlaut flesta þingmenn í kosningunum til þingsins í vor.
Hlaut Juncker 422 af 729 atkvæðum í leynilegri atkvæðagreiðslu Evrópuþingmannanna. Tekur hann við embættinu í nóvember af Portúgalanum Jose Manuel Barroso sem gegnt hefur embættinu undanfarin ár. Til þess að ná kjöri þurfti hann 376 atkvæði. 250 atkvæði féllu gegn honum, 47 sátu hjá og 10 seðlar voru ógildir.
Framkvæmdastjórn Evrópusambandsins fer með veigamikið hlutverk. Hún semur löggjöf, fylgist með fjárlögum aðildarríkjanna, sér til þess að sáttmálar sambandsins komi til framkvæmda og sér um gerð alþjóðlegra viðskiptasamninga.
Í ræðu sinni á þinginu fór hann yfir þau verkefni sem hann telur brýnust fyrir sambandið. Vill hann að evruríkin geri sameiginlega fjárhagsáætlun, aðskilda frá fjárhagsáætlun Evrópusambandsins. Með því sé hægt að hjálpa evruríkjunum að gera nauðsynlegar umbætur á löggjöf sinni. Þá telur hann að Evrópusambandið þurfi 300 milljarða evra fjárfestingaáætlun til þess að skapa störf og auka hagvöxt.
Ekki voru allir Evrópuþingmennirnir ánægðir með kjör Junckers. Töluvert var um óróleika og frammíköll í þingsalnum þegar Juncker hélt ræðu sína áður en þingmennirnir gengu til kjörkassanna. Var það sérstaklega þegar Juncker ræddi framtíð evrunnar og málefni innflytjenda að óróleikinn jókst.
„Algjört hörmungarástand“
Ekki lengur hefðbundin meðferðardeild á Stuðlum
„Umbjóðanda mínum er mjög létt“
RARIK greiðir bætur vegna raftækja
Menn með tengsl við Islamic Jihad á Íslandi
„Við í Prís höfum áhuga á að fara á Nesið“
