Erlent | mbl | 14.10.2014 | 8:16 | Uppfært 11:04

Tannlæknaskýrslur notaðar til að bera kennsl á líkið

Arnis Zalkalns er grunaður um að hafa átt aðild að hvarfi Alice Gross. Ljósmynd Lundúnalögreglan

Lík Arnis Zalkalns, sem er helst grunaður um að hafa myrt bresku stúlkuna Alice Gross, var svo illa farið að það varð að bera kennsl á líkið á grundvelli tannlæknaskýrslna. Þetta kemur fram í frétt Telegraph.

Lettinn Arnis Zalkalns fannst látinn í skóglendi í almenningsgarði í vesturhluta Lundúna nýverið en hann hafði hengt sig. Líkið fannst í innan við 1,5 km fjarlægð frá þeim stað þar sem lík Gross fannst nokkrum dögum áður í ánni Brent.

Dánardómstjórinn segir að lík Zalkalns hafi verið það illa farið að ljóst sé að hann hafi verið látinn í töluverðan tíma. Líkið fannst hinn 4. október, mánuði eftir að síðast sást til hans. Zalkalns sat í fangelsi í Lettlandi í sjö ár fyrir morðið á eiginkonu sinni. Hann flutti til Bretlands fyrir nokkrum árum og var í sambúð. Að sögn dánardómstjórans bendir ekkert til þess að hann hafi verið myrtur.

Síðast sást til Alice Gross, fjórtán ára, á lífi hinn 28. ágúst. Þá sást hún á myndskeiði í öryggismyndavél á gangi meðfram Grand Union-skipaskurðinum í Hanwell. Lík hennar fannst í Brent-ánni rúmum mánuði síðar, vafið í plast. Hafði því verið komið þannig fyrir að erfitt var að finna það.

Á myndskeiðinu úr öryggismyndavélunum sést Zalkalns hjóla sömu leið og Alice Gross einungis nokkrum mínútum á eftir henni. Hann hvarf af heimili sínu hinn 3. september. Enn hefur ekki tekist að fá niðurstöðu í hver dánarorsök Alice Gross var annað en að hún hafi verið myrt.