Erlent | AFP | 24.11.2014 | 6:33 | Uppfært 9:13

Skutu drenginn í magann

Tamir Rice.

Lögreglumenn í Cleveland í Bandaríkjunum skutu tvisvar á dreng sem var með leikfangabyssu á leikvelli um helgina. Annað skotið fór í maga hans. Hann var tólf ára.

Drengurinn var þeldökkur og hefur málið virkað sem olía í eld þeirra sem telja að bandaríska lögreglan beiti svarta íbúa landsins víða misrétti. Fljótlega mun kviðdómur ákveða hvort hvítur lögreglumaður, sem skaut svartan pilt í bænum Ferguson til bana, verði ákærður. Málið í Ferguson í St. Louis hefur vakið gríðarlega athygli. Það átti sér stað í ágúst og síðan þá hafa mikil mótmæli staðið yfir í bænum og til átaka komið milli mótmælenda og lögrelgu. Pilturinn var óvopnaður en lögreglumaðurinn heldur því fram að hann hafi teygt sig í byssu hans og hann því orðið að verja sig og skjóta.

Á laugardag fékk lögreglan í Cleveland í Ohio tilkynningu um að maður væri að veifa byssu á leikvelli í borginni. Samkvæmt fréttum fjölmiðla vestanhafs skutu lögreglumennirnir, sem voru tveir á ferð, tvisvar á drenginn og fór að minnsta kosti annað skotið í maga hans. Drengurinn hét Tamir Rice. Hann lést í gærmorgun af sárum sínum. Í frétt blaðsins The Plain Dealer í Cleveland, var annar lögreglumaðurinn sem skaut nýr í starfi. Báðir lögreglumennirnir hafa verið settir í leyfi frá störfum á meðan rannsókn á málinu fer fram.

Þá kemur einnig fram í fjölmiðlum að sá sem hringdi í neyðarlínuna til að tilkynna um málið hafi sagt að byssan sem maðurinn væri að veifa á leikvellinum væri „líklega gervi“.

Í yfirlýsingu frá lögreglunni í Cleveland segir að lögreglumennirnir hafi beðið drenginn að rétta upp hendur. Það hafi hann ekki gert heldur þess í stað teygt sig í buxnastrenginn eftir byssunni. „Skotum var hleypt af og hinn grunaði var skotinn í búkinn,“ segir í tilkynningu lögreglunnar.

Í yfirlýsingunni kemur einnig fram að um eftirlíkingu af skammbyssu hafi verið að ræða, ekki raunverulegt vopn.

Í ágúst skaut lögreglan mann til bana sem var að koma út úr búð með leikfangabyssu. Maðurinn, John Crawford, var svartur.