Lögreglumenn hafa nú gert áhlaup á kaffihúsið í Sydney í Ástralíu þar sem maður hélt um tuttugu manns í gíslingu. Lögreglan segir að umsátrinu sé nú lokið.

Fleiri gíslar sáust komast út af kaffihúsinu, m.a. sást lögreglumaður halda á grátandi konu út úr húsinu. Í frétt Sky kemur fram að fjórir hafi verið bornir út á sjúkrabörum.

Gíslatökumaðurinn heitir Sheikh Man Haron Mon­is og er 49 ára gam­all. Þetta hef­ur Sky News eft­ir lög­regl­unni í Syd­ney. Seg­ir lög­regl­an jafn­framt að Mon­is sé vel þekkt­ur inn­an lög­regl­unn­ar. BBC segir að maðurinn sé íranskur flóttamaður. Hann er m.a. þekktur fyrir að senda fjölskyldum hermanna í Afganistan hótunarbréf.

Hundruð lögreglumanna hafa setið um kaffihúsið í morgun en rúmlega hálfur sólarhringur er liðinn frá því að maðurinn tók fólkið í gíslingu á Lindt-kaffihúsinu. Hann lét gísla m.a. halda fána úti í glugga með arabískri áletrun á meðan tugum byssuhlaupa var beint að húsinu.

Skothríð hefur heyrst á vettvangi sem og háværar sprengingar að sögn sjónarvotta. Maðurinn hélt því fram að hann væri með þrjár sprengjur. Sprengjuleitarvél, sérstakt vélmenni til þess hannað, er á leið inn í bygginguna til að athuga hvort að sprengjur sé þar að finna.