Erlent | mbl | 13.1.2015 | 20:01 | Uppfært 20:35

„Við erum öll Þýskaland“

Mynd 1 af 3 Athöfnin fór fram við Brandenborgarhliðið í Berlín. AFP

Mynd 2 af 3 Angela Merkel, kanslari Þýskalands, sést hér ásamt skipuleggjanda fundarins í Berlín í kvöld. AFP

Mynd 3 af 3 Joachim Gauck, forseti Þýskalands, ávarpaði samkomuna í kvöld. Hægra megin við pontuna sést Merkel Þýskalandskanslari klappa forsetanum lof í lófa. AFP

Angela Merkel, kanslari Þýskalands, og Joachim Gauck, forseti Þýskalands, voru viðstödd athöfn í Berlín í kvöld sem samtök múslíma stóðu fyrir til að hvetja til umburðarlyndis og trúfrelsis í landinu.

Skipuleggjendur segja ennfremur að tilgangur athafnarinnar sé að fordæma hryðjuverkin sem voru framin í París, höfuðborg Frakklands, í síðustu viku. Einnig að sýna samstöðu með þeim sem féllu fyrir hendi byssumannanna. Þetta kemur fram á vef BBC.

Þeir vilja jafnframt bregðast við fjöldafundum sem Pegida-samtökin hafa staðið fyrir víðsvegar um Þýskaland en þar hefur „íslamsvæðingu vesturlanda“, eins og það er orðað, verið mótmælt. Um 25.000 manns tóku þátt í slíkum fjöldafundi í Dresden í gærkvöldi.

„Við erum öll Þýskaland,“ sagði Gauck, sem ávarpaði samkomuna í kvöld.

„Fjölbreytileiki Þýskalands hefur aukist með innflytjendum - trúarlega, menningarlega og andlega. Þessi fjölbreytileiki hefur aukið farsæld okkar, gert Þýskaland áhugaverðara og viðkunnanlegra,“ sagði forsetinn ennfremur.

„Við stöndum saman með Þýskalandi sem er opið gagnvart umheiminum, með stórt hjarta, sem virðir skoðanafrelsi, fjölmiðlafrelsi og trúfrelsi,“ sagði Aiman Mazyek, leiðtogi samtaka múslíma í Þýskalandi, í kvöld.