Tók þrjú ungmenni af lífi

Lögregla var kölluð út eftir að byssuhvellir heyrðust frá fjölbýlishúsinu sem fólkið bjó í við Summerwalk Circle á Chapel Hill. Lögreglan hefur handtekið 46 ára gamlan mann, Craig Stephen Hicks, grunaður um að hafa myrt fólkið af yfirlögðu ráði.

Morðin hafa vakið hörð viðbrögð á samfélagsmiðlum þar sem fólk hefur birt fjölmargar myndir af fórnarlömbunum þar sem þau sjást við nám og leik. Þar er aftöku þeirra líkt við árásina á ritstjórn Charlie Hebdo í París og aðrir hvetja forseta Bandaríkjanna, Barack Obama og trúarleiðtoga til þess að fordæma árásina.

Barakat var tannlæknanemi við Háskólann í Norður-Karólínu og starfaði auk þess sem sjálfboðaliði hjá samtökum sem veittu börnum í neyð í Palestínu tannlæknaþjónustu. Hann var mikill áhugamaður um knattspyrnu og körfubolta.

Hann var mjög virkur á Twitter og skrifaði í janúar: „Það er svo skelfilega sorglegt að heyra fólk segja að það eigi að drepa gyðinga eða Palestínumenn. Eins og það leysi eitthvað.“

Pazan hafði mikinn áhuga á listum og ljósmyndum og hóf nám í arkitektúr og umhverfishönnun við Háskólann í Norður-Karólínu í fyrra.