Franska vikuritið Paris Match hefur birt tímalínu sem lýsir þeirri atburðarás sem átti sér stað í farþegaþotu Germanwings áður en hún fórst í frönsku Ölpunum 24. mars. Tímalínan byggir á raddupptöku sem annar flugriti tók upp í stjórnklefa flugvélarinnar.

Paris Match segir að einn rannsakenda hafi upplýst vikuritið um efni upptökunnar. Auk þess hefur Paris Match og þýska blaðið Bild fengið myndskeið, sem var tekið upp á farsíma, sem sýnir síðustu sekúndurnar um borð í vélinni. Farsíminn fannst í á meðal flugvélabraksins þar sem vélin brotlenti. Alls létust 150 manns.

Tímalínan og lýsing rannsakandans er eftirfarandi:

Klukkan 10:00

Vélin hefur sig til flugs

Klukkan 10:10

Flugstjórinn segir við aðstoðarflugmanninn  Andreas Lubitz: „Ég náði ekki að fara á salernið áður en við lögðum af stað.“ Lubitz svarar: „Farðu þegar þér hentar.“

Klukkan 10:27

Flugvélin nær farflugshæð: 38.000 fetum (11.000 metrum)

Flugstjórinn biður Lubitz um að hefja undirbúning að lendingu og fá það staðfest að vélin geti hafið lendingarferlið. Lubitz hlýðir. Hann segir aftur við flugstjórann: „Þú getur farið. Þú getur farið núna.“

Klukkan 10:28

Hljóð heyrast frá sæti: flugstjórinn hefur losað sætisólarnar. Dyr opnast. Flugstjórinn segir við Lubitz: „Nú ert þú við stjórnvölinn.“

Lubitz svarar að því er virðist í léttur í bragði: „Ég vona það.“

Klukkan 10:30

Lubitz er einn í flugstjórnarklefanum. Hann læsir brynvarinni hurð með því að ýta á hnapp. Nú er ekki lengur hægt að opna dyrnar að utanverðu. Heyra má þegar sjálfsstýring vélarinnar er endurforrituð til að hraða lendingu, á nokkrum mínútum lækkar vélin sig úr 38.000 fetum (11.500 metrum) í 100 fet (30 metra).

Klukkan 10:33

Lendingarferlið hefst. Vélin lækkar sig um 3.000 fet (900 metra) á mínútu. Flugstjórnarmenn verða varir við vandamál. Þeir reyna nokkrum sinnum að ná sambandi við flugvélina í gegnum talstöð. Lubitz svarar ekki. 

Rödd flugstjórans heyris þegar hann reynir að opna dyrnar: „Þetta er ég!“. Flugstjórinn stendur fyrir framan myndavél sem er tengd við flugstjórnarklefann. Lubitz sér hann á skjá en bregst ekki við. Flugstjórinn sækir súrefniskút eða slökkviliðstæki til að brjóta sér leið inn. Lubitz svarar engu. Flugstjórinn heyrist hrópa: „Í guðs bænum, opnaðu þessar dyr!“

Um klukkan 10:34

Fyrsta viðvörunin fer í gang, bæði hljóð og mynd: „ÓEÐLILEGUR LÆKKUNARHRAÐI, HÆKKIÐ FLUGIГ

Lubitz sýnir engin viðbrögð. 

Í gegnum dyrnar að flugstjórnarklefanum má heyra í farþegum hlaupa um á göngum vélarinnar. 

Klukkan 10:35

Flugstjórinn biður um kúbein sem er falið aftast í flugvélinni. Háværari högg heyrast þegar lamið er á hurðinni, í kjölfarið heyrast málmhljóð. Flugstjórinn reynir að þvinga hurðina upp með kúbeininu. 

Klukkan 10:37 

Önnur viðvörun fer í gang, bæði hljóð og mynd: „LANDSLAG, HÆKKIÐ FLUGIÐ.“ Enn sýnir Lubitz engin viðbrögð. 

Flugstjórinn hrópar: „Opnaðu fjárans hurðina!“

Klukkan 10:38

Þrátt fyrir allan hávaðann, þá má heyra vel heyra andardrátt Lubitz í gegnum súrefnisgrímu sem hann hefur sett á sig. Hann andar með eðlilegum hætti. Vélin er nú í 13.000 fetum (4.000 metrum). 

Klukkan 10:40

Mikill hávaði heyrist fyrir utan. Á sama tíma öskur inni í vélinni. Hægri vængur Airbus-flugvélarinnar rekst í fjall. 

Engin önnur hljóð, fyrir utan viðvaranir og öskur farþega. 

Klukkan 10:41

Flugvélin rekst á Estrop-fjall í 5.000 fetum (1.500 metrum) á 800 km hraða.