Mannréttindadómstóll Evrópu hefur staðfest niðurstöðu dómstóls í Frakklandi þess efnis að gefið verði leyfi fyrir því að slökkva á búnaði sem heldur lífi í heiladauðum manni. Vincent Lambert, 40 ára, hefur verið í dái í sjö ár eftir að hafa lent í mótorhjólaslysi. Fjölskylda hans er klofin í afstöðu sinni hvort það eigi að halda honum á lífi.
Málið var tekið fyrir hjá Mannréttindadómstólnum í fyrra eftir að yfirréttur í Frakklandi hafði heimilað að slökkt yrði á búnaðinum sem heldur honum á lífi. Miklar umræður sköpuðust í kjölfarið í Frakklandi en líknadráp eru ólögleg þar og skiptist franska þjóðin í hópa með og á móti líknadrápum.
Lambert hefur verið haldið á lífi með á matar- og vökvagjöf á spítala í Reims. Eiginkona hans og hluti af systkinum eru sammála læknum sem hafa mælt með því að matar- og vökvagjöfinni verði hætt þar sem engin von er á að hann nái bata.
En foreldrar hans, sem eru kaþólsk og afar heittrúuð, og tvö systkini hans, segja að lífi hans sé ekki lokið og hann þurfi einfaldlega betri umönnun. Dómurinn í Strasbourg dæmdi í málinu og sagði að ákvörðunin um að hætta að gefa Lambert næringu brjóti ekki í bága við mannréttindalög Evrópu.
„Þessari ákvörðun fylgir enginn léttir eða gleði. Við viljum bara að það sem hann hefði viljað verði gert,“ sagði Rachel, eiginkona Lambert, eftir dómsuppkvaðninguna.