Þúsundir söfnuðust saman í borginni Charleston í Suður-Karólínu í Bandaríkjunum í gær og mynduðu tveggja og hálfs kílómetra langa mannlega keðju í nafni friðar og samstöðu í kjölfar harmleiksins sem átti sér stað í Emanuel-kirkjunni í borginni á miðvikudaginn þegar byssumaður skaut níu kirkjugesti til bana.

„Við erum sameinuð sem mannkyn,“ er haft eftir Jay Johnson, forsvarsmanni samtakanna Black Lives Matter. Málið snerist ekki aðeins um líf svartra heldur allra óháð kynþætti. Fram kemur í frétt AFP að atburðurinn hafi verið skipulagður á samfélagsmiðlum með aðeins nokkurra daga fyrirvara. „Þessi ótrúlega þátttaka segir allt sem segja þarf,“ ef haft eftir Dorsey Fairbairn, einum af skipuleggjendunum.