Saksóknari í Ohio ríki Bandaríkjanna hefur birt tvær skýrslur þar sem fram kemur að lögreglumaður hafi ekki brotið af sér þegar hann skaut tólf ára dreng til bana í nóvember á síðasta ári. NBC segir frá þessu.

Skýrslurnar voru gerðar af sitthvorum aðilanum, önnur þeirra var gerð af fyrrum FBI lögreglumanni og hin af saksóknara í Denver. Í báðum skýrslunum var niðurstaðan sú að lögreglumaðurinn Timothy Loehmann hafi brugðist rétt við þegar hann skaut Tamir Rice. Drengurinn hélt á leikfangabyssu sem leit út eins og skammbyssa.

Bandarískur kviðdómur mun þó ákveða hvort að Loehmann verði ákærður vegna dauða drengsins eða ekki.

Saksóknarinn í Cuyahoga sýslu, Timothy J. McGinty sagðist hafa birt skýrslurnar til þess að gæta gagnsæis.

„Það næst engin ákveðin niðurstaða með þessum skýrslum,“ sagði McGinty í yfirlýsingu. „Samansöfnun sönnunargagna heldur áfram og kviðdómurinn mun meta þau öll.“

Subodh Chandra, lögfræðingur Rice fjölskyldunnar gagnrýndi skýrslurnar. „Þessir svokölluðu „sérfræðingar“ eru allir í liði lögreglunnar og hunsa þá einföldu staðreynd að lögreglumennirnir skutu Tamir strax án þess að meta stöðuna.“

Á Tamir að hafa verið skotinn eftir að hann fór ekki eftir fyrirmælum lögreglu og teygði sig í buxnastreng sinn.

Fyrrum FBI lögreglukonan Kimberly A. Crawford kemst að þeirri niðurstöðu í sinni skýrslu að Loehmann hafi þurft að bregðast fljótt við Rice. Hún segir ljóst að viðbrögð Rice hefðu getað verið ógn gegn lögreglumanninum.

Í hinni skýrslunni, frá S. Lamar Sims, saksóknara í Denver, er vitnað í myndbönd sem sýna Loehmann yfirgefa bifreið sína og hlaupa í skjól sem að mati Sims sýni að hann hafi litið svo á að hann væri í hættu.

„Lögreglumennirnir bjuggu stöðuna ekki til. Þeir þurftu að bregðast við stöðu sem gæti hafa komið almennum borgurum í hættu,“ skrifaði Sims.

Dauði Rice vakti mikla reiði og var honum mótmælt í Cleveland og öðrum borgum Bandaríkjanna. Fjölskylda drengsins hefur nú hafið lögsókn gegn Loehmann og lögreglumanninum sem var með honum.

Í desember var það formlega úrskurðað að dauði Rice hafi verið manndráp. Sam­kvæmt krufn­ing­ar­skýrslu var dreng­ur­inn m.a. skot­inn í mag­ann

Tengdar fréttir

Lögreglan í Bandaríkjunum

Fyrrverandi lögreglumaður fundinn sekur

• Myndefni sýnir lögreglumenn skjóta svarta konu til bana
• Neita sök í máli Tyre Nichols
• Myndskeið af 90 skotum lögreglu gert opinbert
• „Aldrei séð neitt þessu líkt“

» Fleiri tengdar fréttir

• 1 blogg um fréttina

Bloggað um fréttina

• Ómar Ragnarsson: Hin almenna byssueign er ógnin.