Erlent | mbl | 26.11.2015 | 13:31 | Uppfært 13:55

Pútín bíður eftir afsökunarbeiðni

Pútin í Kreml í morgun. AFP

Forseti Rússlands, Vladimir Pútín, segist enn bíða eftir afsökunarbeiðni frá tyrkneskum yfirvöldum eftir að rússnesk herþota var skotin niður við landamæri Tyrklands og Sýrlands á þriðjudaginn. Pútín hefur sakað leiðtoga Tyrklands um að eyðileggja samband ríkjanna.

Tyrkir hafa birt upptökur sem eiga að sýna fram á að tyrkneskir hermenn hafi sent frá sér viðvörun á þriðjudag þegar rússneska þotan nálgaðist landamæri Tyrklands. Að sögn Rússa var þotan skotin niður án viðvörunar en hún var að varpa sprengjum yfir Sýrlandi. Þotan hrapaði í sýrlensku fjalllendi eftir að hún varð fyrir flugskeyti.

Mikil spenna hefur myndast á milli Tyrkja og Rússa í kjölfar atviksins. Bandaríkin, Evrópusambandið og Atlantshafsbandalagið hafa hvatt til stillingar.

Bæði Rússar og Tyrkir taka þátt í alþjóðlegum viðræðum vegna ástandsins í Sýrlandi og starfsemi Ríkis íslams.

Francois Hollande, forseti Frakklands, fer til Moskvu í dag til þess að ræða baráttuna gegn Ríki íslams, en 130 létu lífið í árásum samtakanna í París 13. nóvember.

Pútín lét reiði sína gagnvart Tyrkjum aftur í ljós í dag, og kallaði það að fá „rýting í bakið“ að þotan hefði verið skotin niður. Sagði hann Rússa hafa litið á Tyrki sem „bandamenn og samstarfsmenn í baráttunni gegn hryðjuverkum“.

Hann sagði jafnframt að Rússar hefðu aldrei fengið „skýra afsökunarbeiðni“ frá Tyrklandi eða loforð um að „glæpamönnunum“ sem skutu þotuna niður yrði refsað.

„Maður fær það á tilfinninguna að tyrknesk stjórnvöld séu viljandi að reyna að eyðileggja samband ríkjanna,“ sagði hann.

Á þriðjudag lýstu Rússar því yfir að þeir myndu setja strangari reglur þegar kemur að innflutningi matvæla frá Tyrklandi. Rússneskur embættismaður sagði að 15% tyrkneskra matvæla hefðu ekki staðist rússneskra staðla.

Rússar hafa einnig hætt hersamskiptum við Tyrki og lýst því yfir að nú muni orrustuþotur ávallt fylgja sprengjuþotum Rússa í Sýrlandi.

Frétt BBC.