Edward Snowden segir nauðsynlegt að endurskoða löggjöf um réttindi uppljóstrara í Bandaríkjunum. Þetta segir hann eftir að heimildarmaður innan úr varnarmálaráðuneyti Bandaríkjanna sagði frá því að kerfið reyni að veiða uppljóstrara í gildru til að koma í veg fyrir uppljóstranir.

John Crane, fyrrum starfsmaður Pentagon, steig nýverið fram og greindi frá þessum starfsháttum varnarmálaráðuneytisins. Stinga orð hans í stúf við það sem Hillary Clinton og Barack Obama hafa haldið fram. Hafa þau bæði sagt að núverandi löggjöf verndi uppljóstrara á borð við Edward Snowden. 

Segist Snowden hafa reynt að vara uppljóstrara úr Pentagon við slíkum gildrum í langan tíma. „Uppljóstrarar í þessari stöðu eru að leika sér að eldinum,“ segir Snowden í viðtali við The Guardian.

Hann segir enn fremur: „Við þurfum skýra, framkvæmanlega löggjöf sem verndar uppljóstrara og við þurfum fyrirmyndir sem sýna að það er hægt að ljóstra upp um leyndarmál án þess að hafna í fangelsi. Það eru engir hvatar fyrir uppljóstrara í dag til þess að segja frá ólöglegum starfsháttum ráðuneyta og opinberra stofnana og það mun ekki breytast nema með breyttri löggjöf.“

Tengdar fréttir

Edward Snowden

Snowden fær rússneskan ríkisborgararétt

• Njósnuðu um Hvíta húsið
• Hjálpuðu Snowden og er synjað um hæli
• Í hættu eftir að hafa aðstoðað Snowden
• Segja lögregluna á hælum sér

» Fleiri tengdar fréttir

• 1 blogg um fréttina

Bloggað um fréttina

• Jóhann Elíasson: STÉTTARFÉLAG GLÆPAMANNA?