John Brennan, yfirmaður bandarísku leyniþjónustunnar, CIA, segir allt benda til þess að samtökin Ríki íslams hafi staðið að baki hryðjuverkaárásinni á Ataturk-flugvöllinn í Istanbúl í gærkvöldi.

Það hefur þó ekki enn fengist staðfest. Enginn hefur enn lýst yfir ábyrgð á ódæðinu.

Þrír vopnaðir menn hófu skothríð og sprengdu sig í loft upp á flugvellinum í gærkvöldi. 42 manns féllu í árásinni, þar á meðal þrettán erlendir ferðamenn, en til viðbótar særðust yfir 230 manns.

Strax í gærkvöldi bendluðu tyrknesk stjórnvöld Ríki íslams við árásina.

Brennan sagði í kvöld að vígamenn samtakanna hefðu áður staðið að baki svipuðum árásum og í Istanbúl.

Hann sagði jafnframt að það kæmi sér ekki á óvart ef samtökin legðu nú á ráðin um hryðjuverkaárásir á Bandaríkin sem og á bandarísk skotmörk um allan heim, að því er segir í frétt Reuters.

Tengdar fréttir

Sprengjuárásir í Tyrklandi

Sendiráði Bandaríkjanna lokað

• Sprenging í Tyrklandi
• Ráðist gegn Kúrdum
• Handtóku vígamenn Ríkis íslams
• Alls 30 ákærðir vegna árásarinnar

» Fleiri tengdar fréttir

• Blogga um frétt