Stúdentaleiðtogi í Hong Kong sakfelldur

Dómstóll í Hong Kong sakfelldi í morgun stúdentaleiðtogann Joshua Wong fyrir aðild sína að mótmælum gegn kínverskum stjórnvöldum í september 2014.

Wong og tveir aðrir klifruðu yfir girðingar og komust inn í opinbera byggingu í Hong Kong 26. september 2014.

Aðgerðir þeirra leiddu af sér öldu mótmæla og fjöldagöngur sem stóði yfir í um tvo mánuði. Mótmælahreyfingin krafðist þess að stjórnvöld í Peking heimiluðu frjálsar kosningar um hver yrði leiðtogi Hong Kong.

Lögðu mótmælendur undir sig götur í viðskiptahverfinu í miðborg Hong Kong.

Joshua Wong vakti mikla athygli í mótmælunum með sköru­leg­um ræðum og bein­skeyttri gagnrýni á kínversk yf­ir­völd­. Hann var aðeins fimmtán ára þegar hann stofnaði nemendahreyfingu árið 2012 til þess að berj­ast gegn áform­um yf­ir­vald­a um að taka upp nýja og „þjóðrækn­is­lega“ nám­skrá í skól­um Hong Kong til að styrkja tengsl­in við Kína. Tug­ir þúsunda nem­enda tóku þátt í mót­mæl­um hreyf­ing­ar­inn­ar og þau urðu til þess að hætt var við nám­skrána.

Kín­versk yf­ir­völd reyndu að ófrægja hann með ásök­un­um um að hann væri á mála hjá leyniþjón­ustu Banda­ríkj­anna.

Wong á nú hins vegar yfir höfði sér tveggja ára fangelsisdóm.

Helstu samstarfsmenn Wong í baráttunni, Alex Chow og Nathan Law, voru jafnframt sakfelldir í morgun fyrir aðild sína að mótmælunum.

Þeir voru allir leystir úr haldi gegn tryggingu, en þurfa að mæta aftur fyrir dómstól 15. ágúst næstkomandi. Verður þá refsing þeirra ákveðin.

Joshua Wong, Nathan Law og Alex Chow,. AFP

• Blogga um frétt