Tilviljun eða tengdir atburðir?

Bandarísk stjórnvöld neituðu að afhenda írönskum stjórnvöldum fjármuni að upphæð 400 milljónir dollara fyrr en fjórir Bandaríkjamenn höfðu verið leystir úr haldi í landinu í janúar. Þetta segir bandaríska viðskiptablaðið Wall Street Journal að komi fram í nýjum upplýsingum um málið. Þær sýni fram á vandlega skipulagða áætlun sem snúist hafi um lausn fanganna. Upplýsingarnar komi frá bandarískum embættismönnum og öðrum sem upplýstir hafi verið um málið.

Fram kemur í frétt blaðsins að flogið hafi verið með fjármunina, sem hafi verið í evrum, svissneskum frönkum og öðrum gjaldmiðlum, til Írans í ómerktri flutningavél að sögn embættismannanna. Peningarnir hafi verið fengnir hjá seðlabönkum Hollands og Sviss en þeir hafi verið fyrsta greiðsla ríkisstjórnar Baracks Obama Bandaríkjaforseta vegna samkomulags við stjórnvöld í Íran um lausn áratugagamals deilumáls vegna vopnasölusamnings sem undirritaður var skömmu áður en keisara landsins var steypt af stóli árið 1979.

Keisarastjórnin hafði lagt 400 milljónir dollara inn á reikning í Bandaríkjunum til þess að greiða fyrir vopnakaup en vopnin, þar á meðal orrustuþotur, voru hins vegar ekki afhent í kjölfar byltingarinnar. Fjármunirnir voru einnig sendir til Írans um sama leyti og gengið var frá samkomulagi um kjarnorkuáætlun Írans. Íranskir fjölmiðlar hafa fullyrt að flugvélin með fjármunina hafi lent í Íran á sama tíma og fangarnir hafi yfirgefið landið.

Bandarískir ráðamenn hafa hafnað því að greiðsla fjármunanna tengist lausn fanganna á nokkurn hátt. Einungis hafi verið um að ræða lausn á gömlu deilumáli sem verið hafi í meðferð alþjóðlegra dómstóla. Fjölmiðlar í Íran hafa hins vegar meðal annars eftir íranska hershöfðingjanum Mohammad Reza Naghdi að bandarísk stjórnvöld hafi látið undan kröfum Írana og að bein tengsl væru á milli greiðslu fjármunanna og gíslamálsins.

• Blogga um frétt