Hæstiréttur Noregs hafnaði í dag beiðni landflótta uppljóstrarans Edward Snowden um að hann gæti heimsótt Noreg án þess að eiga á hættu að vera framseldur til Bandaríkjanna. Frá þessu er greint á fréttavef BBC.

Snowden höfðaði mál í apríl til að reyna að tryggja að hann gæti tekið á móti málfrelsisverðlaunum í Noregi, án þess að eiga það á hættu að verða framseldur. Héraðsdómur Oslóar hafði þegar hafnað beiðninni, sem og norskur áfrýjunardómstóll.

Norsk deild PEN Club samtakanna hafði boðið Snowden til Oslóar til að veita Ossietzky-verðlaun­un­um viðtöku, en þau eru veitt þeim sem þykja hafa lagt mikið í söl­urn­ar í þágu tján­ing­ar­frels­is­ins.

Snowden var greinandi hjá bandarísku þjóðaröryggisstofnuninni (NSA) er hann ljóstraði upp um ýmis leynigögn banda­rískra stofn­ana. Þar í landi á hann  yfir höfði sér ákær­ur sem gætu orðið til þess að hann þarf að afplána allt að 30 ára fang­els­is­dóm.

Lögfræðingar Snowden, sem hefur dvalið í Rússlandi frá 2013, segja það gefið mál að hann verði fundinn sekur og dæmdur til fangelsisvistar verði hann framseldur til Bandaríkjanna.

Hæstiréttur Noregs sagði að dómstóllinn gæti ekki úrskurðað um lagalegan rétt beiðni bandarískra stjórnvalda til að fá Snowden framseldan, þar sem enginn slík beiðni hefði enn verið lögð fram.

Tengdar fréttir

Edward Snowden

Snowden fær rússneskan ríkisborgararétt

• Njósnuðu um Hvíta húsið
• Hjálpuðu Snowden og er synjað um hæli
• Í hættu eftir að hafa aðstoðað Snowden
• Segja lögregluna á hælum sér

» Fleiri tengdar fréttir

• 1 blogg um fréttina

Bloggað um fréttina

• Jóhann Elíasson: ÞARNA ER ÞAÐ BARA Á HREINU GLÆPAMENN GETA EKKI REIKNAÐ …