Kólumbíska þingið hefur samþykkt friðarsamning sem stjórnvöld gerðu við skæruliðasamtökin FARC um að binda endi á fimm áratuga átök sem hafa kostað 260.000 manns lífið. Fyrri samningi var hafnað í þjóðaratkvæðagreiðslu en nýi samningurinn krefst ekki samþykkis þjóðarinnar.

Neðri deild þingsins staðfesti samkomulagið í dag þrátt fyrir andmæli stjórnarandstöðunnar en áður hafði meirihluti öldungadeildarþingmanna ljáð því samþykki sitt, að því er kemur fram í frétt breska ríkisútvarpsins BBC.

Frétt Mbl.is: Friðarsamkomulag við FARC undirritað

Samkvæmt samkomulaginu yfirgefa þúsundir FARC-liða búðir sínar í skógum landsins og leggja niður vopn. Þá munu samtökin stofna stjórnmálaflokk í staðinn. Herinn ætlar að færa sig inn á þau svæði sem FARC hefur haldið til að koma í veg fyrir að fíkniefnagengi sölsi þau undir sig.

Andstæðingar samkomulagsins segja að með því sé of mikið látið eftir til skæruliðanna, þar á meðal mildi sem sé sýnd þeim sem hafi framið glæpi á meðan á átökunum stóð. Breytingar voru gerðar á samkomulaginu eftir að fyrstu útgáfu þess var hafnað í þjóðaratkvæðagreiðslu í október.

Juan Manuel Santos, forseti Kólumbíu, segir að tekið sé tillit til sjónarmiða gagnrýnenda í nýju útgáfu samkomulagsins. Álvaro Uribe, leiðtogi stjórnarandstöðunnar og fyrrverandi forseti landsins, segir það engu að síður enn sýna skæruliðunum of mikla mildi. 

Frétt BBC

Tengdar fréttir

Kólumbía

Játningar böðuls

• Fordæmir áform um launmorð
• Glæpasamtök gefa sig fram
• Handtóku leiðtoga skæruliða
• Stríðsglæpadómstóll í Kólumbíu

» Fleiri tengdar fréttir

• Blogga um frétt