Erlent | mbl | 10.12.2016 | 10:06 | Uppfært 11.12.2016 15:57

Segja Rússa bera ábyrgð á netárásum

Vladimir Putin, forseti Rússlands. AFP

Bandarískar leyniþjónustur, m.a. CIA, halda því nú fram að rússnesk yfirvöld hafi haft puttana í forsetakosningunum í landinu og beri að hluta til ábyrgð á góðu gengi Donald Trump. Greint er frá þessu í fjölmiðlum vestanhafs, m.a. í New York Times þar sem fram kemur að leyniþjónusturnar séu „mjög vissar“ í málinu og telji Rússa hafa tekið þátt í að hakka tölvupósta demókrata.

Upplýsingateymi Trump neitaði ásökunum. „Þetta er sama fólkið og sagði að Saddam Hussein ætti gereyðingavopn,“ sagði í tilkynningu frá skrifstofu Trump.

Þá hafa rússneskir embættismenn ítrekað neitað ásökunum þess efnis að rússnesk stjórnvöld tengist netárásunum.

Barack Obama, forseti Bandaríkjanna, fyrirskipaði í gær að netárásir á meðan kosningabaráttan stóð yfir yrðu rannsakaðar. Árásirnar hafa verið bendlaðar við Rússa.

Fyrri frétt mbl.is: Ætlar að rannsaka alvarlegar netárásir

M.a. réðust tölvuþrjótarnir á tölvupósta innan Demókrataflokksins og helsta aðstoðarmanns Hillary Clinton, frambjóðanda demókrata. Í október kenndu bandarískir embættismenn Rússum um netárásirnar og sökuðu þá um að skipta sér af kosningabaráttunni.

Nú vitnar New York Times í yfirmenn hjá bandarískum leyniþjónustum sem segjast vera vissir um að rússneskir hakkarar hafi komist inn í tölvukerfi landsnefnda Repúblikaflokksins og Demókrataflokksins en aðeins birt upplýsingar sem fundust í kerfi demókrata.

Er talið að rússnesku hakkararnir hafi látið WikiLeaks fá þau skjöl sem fundust í tölvukerfi demókratanna.

Demókratar brugðust illa við þegar að í ljós kom að einhver hafi hakkað sig inn í tölvupósta landsnefndarinnar og John Podesta, kosningastjóra Clinton. Tölvupóstar Podesta voru birtir á vefsíðu Wikileaks.

The Washington Post vitnar í ónefndan embættismann sem segir leyniþjónustur hafa borið kennsl á einstaklinga sem tengjast rússneskum stjórnvöldum og hafa afhent WikiLeaks þúsundir tölvupósta frá landsnefndinni og Podega.

Á einum tímapunkti í kosningabaráttu sinni hvatti Trump Rússa opinberlega til þess að „finna“ tölvupósta Clinton en sagðist seinna hafa verið að tala í kaldhæðni.

Demókratar hafa sagt netárásirnar viljandi verk til þess að sverta kosningabaráttu Clinton.

Talsmaður Hvíta hússins sagði í gær að Obama vildi rannsaka netárásirnar því hann taldi þær „mjög alvarlegar“.