Þýska leyniþjónustan (BND) er sögð hafa njósnað um erlenda fréttamenn, m.a. fréttamenn BBC, Reuters og New York Times. BND er sögð hafa hlerað símtöl, tölvupósta og faxskilaboð.
Fram kemur á vef BBC, að leyniþjónustan hafi hafið njósnir árið 1999 og hafi m.a. fylgst með mörgum fréttamönnum BBC sem störfuðu í London og Afganistan. Frá þessu er greint í þýska blaðinu Spiegel.
Talsmaður BBC lýsir yfir vonbrigðum vegna þessa og hefur breska ríkisútvarpið send BND athugasemd en ekki fengið nein viðbrögð.
Fram kemur í Spiegel að a.m.k. 50 símanúmer alþjóðlegra blaðamanna hafi verið undir eftirliti þýsku leyniþjónustunnar. Von er á frekari upplýsingum um málið í dag að sögn Spiegel, en blaðið segist hafa séð gögn frá þýska þinginu varðandi rannsókn á þátttöku BND í umfangsmiklu rafrænu eftirliti bandarískra yfirvalda, sem bandaríski uppljóstrarinn Edward Snowden átti þátt í að svipta hulunni af.