Nicola Sturgeon, forsætisráðherra skosku heimastjórnarinnar, segir mögulegt að halda aðra þjóðaratkvæðagreiðslu um sjálfstæði Skotlands haustið 2018.

Í samtali við fréttastofu BBC, sem birt var í dag, segir Sturgeon að kosning um sjálfstæði á meðal Skota, mikill meirihluti hverra kaus áframhaldandi veru í Evrópusambandinu, væri skynsamleg í ljósi þess að Bretland væri á leið út úr sambandinu.

Þá sagði hún aðspurð að hægt væri að halda slíka atkvæðagreiðslu haustið 2018.

Haldin var þjóðaratkvæðagreiðsla um sjálfstæði Skotlands árið 2014, þar sem 55% völdu að vera áfram hluti af Bretlandi en 45% vildu yfirgefa það.

Breska ríkisstjórnin hefur lýst því yfir að sú kosning geri út um þessa spurningu fyrir þessa kynslóð, en Sturgeon hefur sagt á móti að aðstæður hafi breyst þar sem nú sé Skotland á leið út úr ESB gegn vilja sínum.

Sturgeon þarf þó leyfi frá ríkisstjórninni til að mega halda aðra atkvæðagreiðslu. Herma sumar heimildir að þess gæti hún óskað á næsta landsfundi flokks síns, sem haldinn verður síðar í þessum mánuði.

Tengdar fréttir

Skotland

Swinney nýr forsætisráðherra Skotlands

• Síðustu vikur martröð fyrir Stur­geon
• Murrell enn félagi þrátt fyrir rann­sókn
• Vilja kjósa um sjálfstæði Skotlands á ný
• Skrifaði bréf til Sturgeon

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Skosk mótsögn: sjálfstæði frá London til ófrelsis í Brussel