Erlent | mbl | 11.3.2017 | 8:57 | Uppfært 10.4.2017 13:52

Versta hungursneyð frá stofnun SÞ

Flóttamenn frá Suður-Súdan bíða í flóttamannabúðum við landamærin. Sameinuðu þjóðirnar vara við mikilli hungursneyð í Suður-Súdan, Jemen, Sómalíu og Nígeríu. AFP

Heimurinn stendur frammi fyrir verstu hungursneyð sem upp hefur komið frá stofnun Sameinuðu þjóðanna (SÞ), að því er fréttavefur BBC hefur eftir Stephen O‘Brien, yfirmanni mannúðar- og neyðarhjálpar Sameinuðu þjóðanna.

O'Brien segir hungursneyð nú blasa við 20 milljónum manna í Jemen, Sómalíu, Suður-Súdan og Nígeríu og að þörf sé á 4,4 milljarða dollara fjárframlagi til að forðast megi hörmungarnar.

Barnahjálp Sameinuðu þjóðanna, Unicef, hefur þegar varað við því að um 1,4 milljónir barna kunni að svelta í hel fyrir lok þessa árs.

„Þetta er ögurstund,“ sagði O'Brien á fundi með Öryggisráði Sameinuðu þjóðanna á föstudag. „Nú þegar í byrjun þessa árs stöndum við frammi fyrir einum mestu mannúðarhörmungum frá því Sameinuðu þjóðirnar voru stofnaðar.“

Hvetur til sameiginlegs átaks

„Nú þegar blasir hungursneyð við 20 milljónum manna í fjórum löndum. Án sameiginlegs og samhæfðs hnattræns átaks mun þetta fólk einfaldlega svelta í hel. Margir til viðbótar munu svo þjást og deyja úr sjúkdómum.“

Sagði O‘Brien þetta hafa áhrif á þroska barna, lífsgæði og framtíðarmöguleika. „Þrautseigja samfélaga er fljót að dvína og það sem hefur áunnist með þróun hverfur. Margir munu flosna upp frá heimilum sínum og halda af stað í leit að lífsvon og með því mynda enn meiri óstöðugleika í álfunni.“

Orð O'Brien nú minna um margt á ákall Antonio Guterres, aðalritara Sameinuðu þjóðanna, í síðasta mánuði, þegar hann greindi frá því að Sameinuðu þjóðirnar hefðu aðeins fengið greiddar 90 milljónir dollara af þeim miklu loforðum um fjárframlög sem samtökunum hafa borist.

Barn deyr á 10 mínútna fresti í Jemen

Talið er að barn deyi á tíu mínútna fresti í Jemen af völdum sjúkdóma sem hægt er að koma í veg fyrir og að hálf milljón barna undir fimm ára aldri í landinu þjáist af alvarlegri vannæringu.

Sameinuðu þjóðirnar telja að 19 milljónir manna, eða tveir þriðju hlutar íbúa Jemen, þurfi á einhverri mannúðaraðstoð að halda í kjölfar tveggja ára átaka milli uppreisnarmanna Hútí og stjórnvalda sem njóta stuðnings Sádi-Araba.