Danskir bankar notaðir til að þvo fé

Dönsku bankarnir Nordea og Danske Bank eru í hópi þeirra banka sem rússneskir glæpamenn hafa notað til stórtækra peningaþvottaaðgerða. Danska fjármálaeftirlitið er nú sagt vera með málið til skoðunar.

Fjölmiðlar víða um heim fjalla um málið í dag, enda virðist málið teygja sig til 96 ríkja. Fréttavefur Berlingske Tidende greinir frá því að Danske Bank og Nordea, stærstu bankar Danmerkur, hafi verið í hópi þeirra banka sem glæpamennirnir nýttu til að þvo féð. Fjárhæðin sem fór í gegnum dönsku bankana er sögð vera að andvirði um sjö milljarða danskra króna.

Frétt af mbl.is

Nýttu alþjóðlega banka í peningaþvætti

Berlingske var í hópi þeirra fjölmiðla sem fengu aðgang að gögn­un­um, sem samtökin OCCRP, sem fjalla um spillingu og skipulagða glæpastarfsemi, deildu til fjölmiðla í 32 ríkj­um. Segir blaðið peningana hafa verið flutta inn á reikninga í eiga skúffufyrirtækja sem skráð eru í skattaskjólum á borð við Seychellerne og Panama.

„Við höfum ekki haft stjórn á þessu“

Þessar grunsamlegu peningafærslur áttu sér stað á árabilinu 2011 til 2014 og segir Berlingske vekja athygli að útibú Danske Bank í Eistlandi hafi verið mikið notað til viðskiptanna. Andvirði upphæðarinnar sem fór í gegnum útibúið í Eistlandi nemur tæpum sjö milljörðum danskra króna og deilist á 1500 færslur. Um 250 milljónir danskra króna virðast hins vegar hafa farið í gegn í 200 færslum hjá Nordea.

„Við höfum ekki haft stjórn á þessu,“ hefur Berlingske eftir talsmanni Danske Bank, en Nordea hefur ekki viljað tjá sig um fréttirnar að öðru leyti en því að einungis lítill hluti þeirra viðskiptavina sem rannsóknin beinist að séu enn í viðskiptum við bankann.

Hefði átt að uppgötvast fyrr

Fréttavefur danska ríkisútvarpsins hefur eftir Lars Krull, sérfræðingi við Álaborgarháskóla að peningafærslurnar hafi verið það stórar og óvenjulegar að eftirlitskerfi bankanna hefði átt að  vekja athygli á þessu. „Þetta er óvenjulegt innlagnamunstur. Þetta eru háar upphæðir og þetta hefur viðgengist um langan tíma og þetta eru virkilega margar færslur,“ sagði Krull sem undraði sig á að peningaþvotturinn hefði fengið að viðgangast í allan þennan tíma.

„Bankarnir hafa að minnsta kosti ekki gert neitt til að stöðva þessar færslur sérstaklega hratt,“ segir hann. „Þetta hefði átt að uppgötvast miklu fyrr.“

Tengsl við ólígarka, bankamenn og leyniþjónustuna 

Breska dagblaðið Guardian fjallar einnig um málið og segir bank­ana HSBC, Royal Bank of Scot­land, Lloyds, Barclays og Coutts vera meðal þeirra 17 banka sem starf­rækt­ir séu í Bretlandi sem nú séu krafðir svara um vitn­eskju sína um málið og af hverju þeir hafi ekki hafnað grun­sam­leg­um pen­inga­færsl­um.

Gögn­in sem Guar­di­an hef­ur sýna að fjár­mun­ir að and­virði 20 millj­arðar doll­ara virðast hafa verið flutt­ir frá Rússlandi á ára­bil­inu 2010-2014. Rann­sak­end­ur sem nú skoða færsl­urn­ar telja end­an­lega upp­hæð fjár­flutn­ing­anna þó kunna að vera mun hærri og að and­virði þeirra geti jafn­vel numið allt að 80 millj­örðum doll­ara.

Einn þeirra rann­sak­anda sem Guar­di­an ræddi við sagði féð „aug­ljós­lega annaðhvort stolið eða að það ætti ræt­ur sín­ar í glæp­a­starf­semi“. Talið er að hóp­ur um 500 manna standi að pen­ingaþvætt­inu og í hópn­um sé að finna rúss­neska ólig­arka, banka­menn í Moskvu, sem og ein­stak­linga sem ým­ist starfa fyr­ir eða hafa tengsl við rúss­nesku leyniþjón­ust­una FSB.

• Blogga um frétt