Erlent | mbl | 12.6.2017 | 9:24

Pundið nær aftur jafnvægi

Pundið féll talsvert í kjölfar þingkosninganna í Bretlandi í síðustu viku sem vakti nokkurn ugg á breskum mörkuðum. AFP

Breska pundið er að komast aftur á rétt ról eftir mesta gengisfall gjaldmiðilsins í um átta mánuði. Pundið féll talsvert í verði gagnvart öðrum gjaldmiðlum í framhaldi af þingkosningunum í Bretlandi í síðustu viku þar sem Íhaldsflokkurinn, flokkur forsætisráðherrans Theresu May, tapaði meirihluta sínum.

Frétt af mbl.is

Pundið fallið um næstum tvö prósent

Pundið breyttist ekki ýkja mikið gagnvart Bandaríkjadal þegar markaðir opnuðu í morgun og nam um 1,2739 og lækkaði þá um 0,1% gagnvart evru, niður í 1,1367. Í dag nemur pundið 126,22 íslenskum krónum miðað við miðgengi Seðlabankans.

Að sögn sérfræðinga er þess nú beðið á mörkuðum að í ljós komi hvort og þá hvernig ný ríkisstjórn muni breyta nálgun sinni og stefnu varðandi Brexit nú í kjölfar kosninganna.

Gjaldeyrismarkaðir fylgjast því grannt með því hvort útkoma kosninganna muni hafa áhrif á samningaviðræður Breta við Evrópusambandið vegna útgöngu þeirra úr sambandinu. Viðræður eiga að hefjast í byrjun næstu viku en ætla má að útkoma viðræðnanna komi til með að hafa umtalsverð áhrif á bæði hagkerfi Bretlands og Evrópusambandsins.

Frétt BBC