Á örfáum mínútum varð fjölbýlishúsið Grenfell-turn alelda. Myndir af húsinu umvöfðu eldtungum eru sláandi og eftir að þær höfðu að mestu slokknað kom í ljós sótsvört byggingin.

Lundúnabúa tók fljótt að streyma að eftir að eldurinn kom upp til að bjóða fram aðstoð sína. Þeir komu færandi hendi, með mat og föt en flestir íbúar hússins voru í fastasvefni er eldurinn kviknaði í fyrrinótt.

Um 250 slökkviliðsmenn unnu að því að ráða niðurlögum eldsins. Baráttan stóð klukkustundum saman.

Hér að neðan gefur að líta myndir frá harmleiknum sem staðfest er að kostaði sautján mannslíf. Fleiri létust, að sögn lögreglu, en slökkviliðsmenn eru enn að leita að líkum í brunarústunum.

Eldsupptök eru enn ókunn.