Rússneski herinn telur hugsanlegt að leiðtogi hryðjuverkasamtakanna Ríkis íslams, Abu Bakr al-Baghdadi, hafi fallið í loftárás rússneskra orrustuflugvéla í nágrenni borgarinnar Raqa í Sýrlandi. Fram kemur í frétt AFP að stjórnvöld í Rússlandi vinni að því að fá þetta staðfest.

Fram kemur í yfirlýsingu frá rússneska hernum að gerð hafi verið tíu mínútna löng loftárás á stað í nágrenni Raqa þar sem forystumenn Ríkis íslams höfðu komið saman til þess að ræða mögulega brottför liðsmanna samtakanna frá borginni. Um 30 herforingjar og allt að 300 vígamenn, sem gætt hafi öryggis þeirra, hafi verið felldir.

„Samkvæmt upplýsingum, sem unnið er að því að fá staðfestar, var leiðtogi Ríkis íslams, Abu-Bakr al-Baghdadi, einnig viðstaddur fundinn og var drepinn í árásinni,“ segir enn fremur í yfirlýsingunni. Al-Baghdadi hefur ekki sést opinberlega síðan hann lýsti sjálfan sig kalífa í borginni Mósúl í Írak fyrir þremur árum.

Fram kemur í frétt AFP að þetta sé ekki í fyrsta sinn sem vangaveltur hafa komið upp um að Al-Baghdadi hafi látist.

Abu Bakr al-Baghdadi. AFP

Tengdar fréttir

Ríki íslams

Scholz vill herða vopnalöggjöf í kjölfar árásar

• Heimsækir borg þar sem hnífaárás var gerð
• Hryðjuverkasamtök heilla unglinga á Tiktok
• Íslenskur netþjónn hýsti hryðjuverkaáróður
• Neita að tjá sig um Ríki íslams

» Fleiri tengdar fréttir

• Blogga um frétt