„Ég er með skilaboð til allra hvítu þjóðernissinnanna og nasistanna sem komu til Charlottesville í dag. Skilaboð okkar eru skýr: Farið heim. Ykkar er ekki óskað í þessu merka ríki. Skammist ykkar. Þið þykist vera föðurlandsvinir, en þið eruð allt nema föðurlandsvinir.“

Þetta sagði ríkisstjóri Virginíu, Terry McAuliffe, á blaðamannafundi í gær eftir að ljóst varð að að minnsta kosti einn hafði látist vegna átaka sem brutust út í borginni.

„Þið komuð hingað til að meiða fólk. Og þið gerðuð það. En skilaboð mín eru skýr: Við erum sterkari en þið,“ sagði hann svo, samkvæmt umfjöllun BBC.

Ríkisstjórinn, sem er demókrati, sagðist hafa rætt við Donald Trump Bandaríkjaforseta og hvatt hann til að hefja hreyfingu sem komið gæti fólki saman. Þá þakkaði hann lögreglu sem hann sagði hafa komið í veg fyrir „mun verri dag“ og lofaði um leið þá sem hlúðu að hinum særðu.

Ofbeldið í Charlottesville, sem er allajafna frjálslyndur háskólabær, þykir bera skýran vott um vaxandi sundrungu innan Bandaríkjanna, sem stigmagnaðist eftir forsetakjör Trumps seint á síðasta ári.

Tengdar fréttir

Mótmæli í Virginíu

Nýnasisti á ekki kost á reynslulausn

• Nýnasisti fékk lífstíðardóm
• Nýnasisti á leið fyrir dóm
• Ákærður fyrir hatursglæpi
• Hellti sér yfir Trump

» Fleiri tengdar fréttir

• 1 blogg um fréttina

Bloggað um fréttina

• Páll Vilhjálmsson: Hvítir yfirburðir - vestrænt samfélag