Tveir eru látnir eftir stunguárás á vegfarendur á torgi í borginni Turku í Finnlandi síðdegis í dag. Þeir höfðu verið fluttir með stungusár á háskólasjúkrahúsið í borginni. Að minnsta kosti átta fórnarlömb voru flutt á sjúkrahús.

Vegfarendur og sjúkraflutningamenn standa skammt frá torginu og hjúkra konu sem særðist í árásinni. AFP

Fréttir af atburðarásinni eru enn nokkuð óljósar en lögreglan skaut einn árásarmann í fótinn og handtók. Talið er að fleiri hafi verið að verki og er þeirra nú leitað. Lögreglustjórinn Seppo Kolehmainer segir ómögulegt á þessari stundu að segja til hver beri ábyrgð á árásinni. „Við getum ekki útilokað að atburðurinn sé tengdur alþjóðlegum hryðjuverkasamtökum en við getum heldur ekki staðfest það.“

Frétt af mbl.is

Fjöldi varð fyrir stunguárás

Í sænskum fjölmiðlum hefur komið fram að um fimmtán hafi verið stungnir. 

Haft er eftir sjónarvottum að árásarmennirnir hafi verið þrír. Vitni segjast m.a. hafa séð einn þeirra stinga fólk ítrekað með risastórum hnífi. „Við heyrðum unga konu öskra hátt í einu horni torgs­ins,“ seg­ir Laura Laine í sam­tali við vefsíðu fjölmiðilsins Yle. „Við sáum mann á torg­inu og það glampaði á hníf­inn í loft­inu. Ég held að hann hafi stungið ein­hvern.“

Kent Svensson segir í samtali við CNN að hann hafi séð mann með risastóran hvítan hníf hlaupa um og stinga alla sem á vegi hans urðu. „Þetta var alveg hræðilegt. Við sátum úti rétt hjá torginu og kona öskraði og þessi maður stóð fyrir framan hana með risastóran hníf og stakk fólk. Það var blóð út um allt.“

Viðbúnaðarstig hækkað

Mikill viðbúnaður er í Turku sem og víðar í Finnlandi vegna árásarinnar og hefur viðbúnaðarstig verið hækkað alls staðar. Lestarferðum hefur verið aflýst og eftirlit á flugvöllum aukið.

Árásirnar voru gerðar um klukkan 17 að staðartíma á tveimur torgum í miðbænum, Trä-torgi og Salutorgi,  að því er fram kemur í frétt sænska ríkissjónvarpsins. Torgin eru nálægt hvort öðru. 

Lögreglan mun halda blaðamannafund klukkan 16 að íslenskum tíma, 19 að staðartíma.

Tengdar fréttir

Hryðjuverk í Finnlandi

Tveir enn í haldi vegna árásar í Túrkú

• Árásarmaðurinn viljugur til viðræðna
• Tveir til viðbótar handteknir í Finnlandi
• Árásarmaður úrskurðaður í gæsluvarðhald
• Árásarmaðurinn í Turku nafngreindur

» Fleiri tengdar fréttir

• 1 blogg um fréttina

Bloggað um fréttina

• Ómar Geirsson: Sá sem ekki má teikna, er mikill.