Dæmi eru um að læknar hafi ráðlagt konum sem eru sárþjáðar eftir að hafa farið í aðgerð við þvagleka, eða blöðru-, leg og endaþarmssigi, þar sem net er grætt í leggöng þeirra, að stunda endaþarmsmök eða snúa sér að kynlífi með konum, þrátt fyrir að vera gagnkynhneigðar. Margar þessara kvenna hafa upplifað mikinn sársauka við kynlíf eftir aðgerðinar og sumar hverjar treysta sér jafnvel ekki lengur til að stunda kynlíf. Þær upplifa mikið skilningsleysi lækna á vandanum.
Þetta er eitt af því sem hefur komið fram við réttarhöld sem standa nú yfir í alríkisdómstóli Ástralíu þar sem rekið er skaðabótamál yfir 700 kvenna á hendur lyfja- og lækningavörurisanum Johnson & Johnson sem framleiðir netin sem mest hafa verið notuð við slíkar aðgerðir. The Guardian greinir frá.
Ýmis vandkvæði og alvarlegar aukaverkanir hafa komið upp í tengslum við netin og hafa konur lýst óbærilegum sársauka vegna þeirra. Sumar kvennanna geta jafnvel ekki gengið vegna sársauka og ekki stundað kynlíf, líkt og áður sagði. Sjálfsvígshugsanir hafa einnig komið fram. Segja konurnar lífsgæði sín hafa því skerst verulega.
Netin hafa verið notuð af læknum víða um heim, þar á meðal hér á Íslandi, en þó í litlum mæli. Kristín Jónsdóttir, yfirlæknir á kvennadeild Landspítalans, sagði í samtali við mbl.is í síðustu viku að netin hefðu ekki verið nógu mikið rannsökuð og prófuð áður en þau voru sett á markað og kynnt sem lausn við þessu vandamáli. Fleiri læknar deila þeirri skoðun. Kristín sagði netin jafnframt alltof mikið notuð í þeim tilfellum þar sem aðrar leiðir væru æskilegri.
Netin eru annað hvort grædd undir þvagrásina eða undir slímhúð í leggöngum og koma þau í veg fyrir að líffæri, eins og leg og þvagblaðra, sígi niður og þrýsti sér upp að vegg leggangnanna, sem getur valdið konum miklum óþægindum. Er þetta algengt vandamál hjá konum eftir barnsburð.
Við réttarhöldin hafa verið birtir tölvupóstar sem kvensjúkdómalæknar, tengdir Johnson & Johnson, sendu sín á milli og ræddu um vandamál þessara kvenna. Tölvupóstarnir þykja varpa ljósi á algjört skilningsleysi og vanvirðingu gagnvart konunum. Þeir ræddu meðal annars um aðra valkosti kvenna sem upplifa mikinn sársauka við kynlíf eftir aðgerðina.
„Það er alveg satt að samkynhneigð gæti verið góður kostur,“ skrifaði einn læknirinn. Annar talaði um hvað honum þætti erfitt að minnast á kynlíf við sjúklinga sína. „Ég sagði við sjálfan mig að ef ég færi að ræða við sjúklinga mína um fullnægingar, munnmök, samkynhneigð, snípinn, G-blett eða eitthvað eitthvað, þá yrði ég fljótt talinn kynlífssjúkur, pervert eða óeðlilega forvitinn.“ Þá hafa konur sjálfar lýst því réttarhöldin að læknar hafi mælt með endaþarmsmökum.
Tölvupóstar læknanna og frásagnir kvennanna hafa eðlilega misboðið meðlimum í áströlskum stuðningshópi kvenna sem glíma við aukaverkanir vegna netanna. Margar hafa þó svipaða sögu að segja af samskiptum sínum við lækna.
„Leggöngum okkar hefur verið misþyrmt með þessum netum og nú stinga læknar upp á því að endaþarmurinn verði einnig misnotaður. Aðeins kvenhatarar geta hugsað svona,“ skrifaði ein kvennanna inn í sameiginlega Facebook-hóp.
„Þessar hugmyndir gefa það í skyn að konur séu ekkert nema ílát fyrir karlmenn til að losa í. Að það sé hægt að nota hvaða gat sem er. Mér finnst ótrúlegt að einhver, sérstaklega sá sem sérhæfir sig í að meðhöndla konur læknisfræðilega, skuli vera svo hugsunarlaus og hrokafullur, að mæla með að endaþarmsmökum sem lausn á sársaukafullu kynlífi,“ skrifar önnur.
Mikil reiði ríkir meðal kvennanna og þeim finnst þær hafa verið notaðar sem tilraunadýr fyrir framleiðanda netanna. Sambærileg dómsmál hafa verið höfðuð gegn Johnson & Johnson í Bretlandi, Bandaríkjunum og Kanada.
Um þrjár til fjórar aðgerðir við blöðru-, leg og endaþarmssigi, þar sem net eru notuð, eru gerðar hér á landi á ári hverju. Þá er, að sögn Kristínar, búið að reyna alla aðra möguleika. Netin frá Johnson & Johnson voru notuð á Íslandi um árabil en þeim var skipt út fyrir nokkrum árum.