Erlent | mbl | 15.9.2017 | 16:02

May snuprar Trump

Theresa May, forsætisráðherra Bretlands, snupraði forseta Bandaríkjanna, Donald Trump, nú síðdegis fyrir ummæli sem hann lét falla á Twitter fyrr í dag. Þar hélt hann því fram að lögreglan í London hafi vitað af þeim sem bera ábyrgð á sprengjutilræðinu í neðanjarðarlestarkerfi London í morgun.

May gat ekki leynt pirringi sínum á ummælum Trumps þegar hún ræddi við fjölmiðla um árásina á Parsons Green lestarstöðinni en 22 slösuðust í árásinni.

„„„Ég held að það sé aldrei gagnlegt fyrir nokkra manneskju að geta sér til um hvað hafi gerst þegar rannsókn er í fullum gangi,“ segir May..

Eftir að May lét ummælin falla í beinni útsendingu breskra fjölmiðla sagði Trump við blaðamenn vestanhafs að hann ætlaði sér að hringja í forsætisráðherra Bretlands.

Trump sagði á Twitter fyrr í dag að þeir sem komu að árásinni séu veikir og vitstola einstaklingar sem voru undir eftirliti Scotland Yard. Engar slíkar upplýsingar hafa hins vegar verið gefnar út af hálfu yfirvalda í Bretlandi.

Bandaríkjaforseti notaði einnig tækifærið til þess að lýsa jákvæðum áhrifum af ferðabanni því sem hann hefur boðað og árangursríkum aðgerðum sínum gegn vígasamtökunum Ríki íslams.

Spurð um hvort Trump hafi verið að upplýsa um leynilegar upplýsingar sem leyniþjónustur landanna hafa deilt sín á milli sagði May að hún teldi að það væri aldrei til góðs að vera með getgátur þegar rannsókn stendur yfir.

Lögreglan í London segir að ummæli forsetans séu getgátur einnar og komi sér ekki vel.