Robert Mugabe, forseti Simbabve, er í stofufangelsi í heimalandi sínu. Þetta sagði Jacob Zuma, forseti Suður-Afríku, í yfirlýsingu eftir að her Simbabve virtist hafa tekið yfir stjórn landsins.

„Zuma forseti talaði við Robert Mugabe fyrr í dag og hann sagði að hann væri í haldi á heimili sínu en að honum líði vel,” sagði í yfirlýsingu frá ríkisstjórn Suður-Afríku.

Suður-Afríka hefur ákveðið að senda erindreka til Simbabve vegna ástandsins þar í landi. Þeir munu hitta Mugabe og fulltrúa hersins í landinu.

Herforingjar segja að ekki sé um valdarán að ræða heldur beinist aðgerðirnar gegn glæpamönnum. 

Vegatálmar hafa verið settir upp fyrir utan þinghúsið í Simbabve.