Staðfesta að sjór lak inn í kafbátinn
Setja bókamerki
Svo virðist sem sjór hafi komist inn í argentínska kafbátinn San Juan, sem ekkert hefur spurst til síðan þann 15. nóvember síðastliðinn, en 44 áhafnarmeðlimir eru um borð. Talið er að sjór hafi komist inn í bátinn í gegnum lofttúðu á skrokk hans. Sjórinn hafi svo komist í einn af rafgeymum bátsins og orsakað skammhlaup. Þetta hefur BBC eftir talsmanni argentínska sjóhersins.
Enrique Balbi, talsmaður sjóhersins, sagði að áhöfnin hefði tilkynnt um atvikið, en tekist hefði að einangra rafgeyminn og koma í veg fyrir að eldur brytist út. Þá hefði annar rafgeymir í skut bátsins verið notaður til að halda förinni áfram. Áhöfin hugðist sigla bátnum strax til heimahafnar í Mar del Plata, suður af Buenos Aires. Þangað kom báturinn hins vegar aldrei. Síðast spurðist til áhafnarinnar þann 15. nóvember um klukkan hálfellefu að morgni.
Umfangsmikil leit stendur enn yfir og að minnsta kosti þrettán þjóðir aðstoða við hana, m.a. Bandaríkjamenn, Bretar og Rússar. Leitarsvæðið er um 480 þúsund ferkílómetrar að stærð.
Ástvinir áhafnarinnar eru hins vegar flestir búnir að missa vonina um að einhver sé á lífi um borð, en átta dögum eftir að kafbáturinn hvarf komu fram upplýsingar um að sprenging hefði heyrst á svæðinu þar sem síðast náðist samband við hann. Argentínski sjóherinn hefur staðfest að hljóðið gæti hafa stafað af sprengingu í bátnum. Leitin heldur hins vegar áfram.
Við urðum að byrja upp á nýtt
Lýsa yfir stuðningi við kennara
Spá illviðri víða um land á morgun
Telur njósnirnar vega að lýðræðinu á Íslandi
Þegar borgin stal jólunum
Neyðarástand kalli á tafarlaus viðbrögð
Um 170 ný störf gætu skapast