Lögreglumaður dæmdur í 20 ára fangelsi

Fyrrverandi bandarískur lögreglumaður var í dag dæmdur í 20 ára fangelsi fyrir að skjóta svartan karlmann, Walter Scott, í apríl 2015 eftir að hafa stöðvað hann vegna brotins afturljóss. Scott reyndi að flýja úr bifreið sinni en lögreglumaðurinn, Michael Slager, skaut hann í bakið.

Fjallað er um málið í frétt AFP en það leiddi til mikilla mótmæla. Talið er að Scott hafi flúið þar sem hann skuldaði meðlag. Slager, sem er hvítur, sagði um sjálfsvörn að ræða þar sem Scott hafi reynt að ráðast á sig með rafbyssu sem hann hafi náð af lögreglumanninum.

Myndband sem vitni tók sýndi hins vegar hvar Slager skaut Scott í bakið. Lögreglumaðurinn var gagnrýndur fyrir að hafa reynt að hagræða aðstæðum með því að koma rafbyssu sinni fyrir við hlið líks Scotts. Var hann handtekinn í kjölfar þess að myndbandið birtist.

• Blogga um frétt