Erlent | AFP | 18.12.2017 | 18:43 | Uppfært 20:46

Bandaríkin beittu neitunarvaldi

Öryggisráði Sameinuðu þjóðanna kaus í dag um uppkast að samþykkt þar sem synjað er þeirri ákvörðun Donalds Trumps að viðurkenna Jerúsalem sem höfuðborg Ísraels. AFP

Bandaríkin beittu neitunarvaldi sínu í öryggisráði Sameinuðu þjóðanna í dag þegar greidd voru atkvæði um samþykkt þar sem ákvörðun Donalds Trumps, Bandaríkjaforseta, um að viðurkenna Jerúsalem sem höfuðborg Ísraels er synjað. Í tillögunni segir að yfirlýsing Bandaríkjastjórnar hafi ekkert lagalegt gildi og að fella verði hana úr gildi.

Yfirvöld í Palestínu segja það óásættanlegt að Bandaríkin hafi beitt neitunarvaldi sínu. Talsmaður Mahmud Abbas, forseta Palestínu, segir að framkoma Bandaríkjanna í öryggisráðinu sé „óásættanleg og að hún ógni stöðugleika í alþjóðasamfélaginu þar sem ákvörðunin sé vanvirðing við vilja alþjóðasamfélagsins.“

14 af 15 ríkjum SÞ sem eiga sæti í öryggisráðinu greiddu atkvæði með tillögunni.

Riyad H. Mansour, sendiherra Palestínu hjá Sameinuðu þjóðunum, tekur í höndina á Amr Aboulatta, sendiherra Egyptalands hjá SÞ, á fundi öryggisráðsins í dag. AFP

Forsætisráðherra Ísraels, Benjamin Netanyahu, þakkaði Nikki Haley, sendiherra Bandaríkjanna hjá SÞ, fyrir að beita neitunarvaldinu. Þakkirnar færði hann í myndskeiði sem hann birtir á Twitter þar sem hann segir meðal annars: „Sannleikurinn sigrar lygar. Takk fyrir, Trump forseti. Takk fyrir, Nikki Haley.“

Thank you, Ambassador Haley. On Hanukkah, you spoke like a Maccabi. You lit a candle of truth. You dispel the darkness. One defeated the many. Truth defeated lies. Thank you, President Trump. Thank you, Nikki Haley. pic.twitter.com/zFIiStoait
— Benjamin Netanyahu (@netanyahu) December 18, 2017