Blaðamaður myrtur vegna skrifa um skatta

Slóvaskur rannsóknarblaðamaður fannst myrtur á á heimili sínu ásamt unnustu sinni í gær. Lögreglan telur að orsök morðsins megi rekja til skrifa blaðamannsins um skattamál. Mikill óhugur ríkir í Slóvakíu vegna málsins.

Jan Kuciak og Martina Kusnirova voru skotin til bana á heimili sínu í Velka Maca, þorpi sem er um 65 kílómetra austur af Bratislava, höfuðborg Slóvakíu.

„Morðið tengist að öllum líkindum rannsóknarblaðamennsku hans,“ segir lögreglumaður í samtali við BBC.

Kuciak hafði nýverið fjallað um möguleg skattsvik í tengslum við lúxusíbúðir sem nefnast Five Star Residence. Kuciak hafði fyrir slóvaska fréttamiðilinn Aktuality.sk frá árinu 2015 og birtist síðasta frétt hans á vefnum 9. febrúar. Umfjöllunin um lúxusíbúðirnar teygir anga sína meðal annars til innanríkisráðherrans Roberts Kalinak og meintra viðskipta hans við þá sem sáu um lóðareignir á íbúðasvæðinu. Ráðherrann neitar allri aðild að málinu.

„Ef satt reynist að dauði rannsóknarblaðamannsins tengist starfi hans verður það í fyrsta skipti sem gerð er atlaga að tjáningarfrelsi og lýðræði í Slóvakíu með þessum hætti,“ segir Robert Fico, forsætisráðherra Slóvakíu.

Blaðamannsins Jan Kuciak og unnustu hans, Martina Kusnirova, er minnst fyrir utan skrifstofu Aktuality fréttamiðilsins þar sem Jan starfaði. AFP

• Blogga um frétt